نازاربايەۆ ۇكىمەتكە «قازاقستاننىڭ كيەلى جەرلەرىنىڭ گەوگرافياسى» جوباسىن ازىرلەۋدى جۇكتەدى
«جەرگىلىكتى نىساندار مەن ەلدى مەكەندەرگە باعىتتالعان «تۋعان جەر» باعدارلاماسىنان بولەك، ءبىز حالىقتىڭ ساناسىنا ودان دا ماڭىزدىراق - جالپى ۇلتتىق قاسيەتتى ورىندار ۇعىمىن ءسىڭىرۋىمىز كەرەك. ول ءۇشىن «قازاقستاننىڭ قاسيەتتى رۋحاني قۇندىلىقتارى» نەمەسە «قازاقستاننىڭ كيەلى جەرلەرىنىڭ گەوگرافياسى» جوباسى كەرەك. ءاربىر حالىقتىڭ، ءاربىر وركەنيەتتىڭ بارشاعا ورتاق قاسيەتتى جەرلەرى بولادى، ونى سول حالىقتىڭ ءاربىر ازاماتى بىلەدى. بۇل - رۋحاني ءداستۇردىڭ باستى نەگىزدەرىنىڭ ءبىرى. ءبىز - ۇلان- عايىر جەرى مەن اسا باي رۋحاني تاريحى بار ەلمىز. ۇلى دالانىڭ كوز جەتكىزگىسىز كەڭ- بايتاق اۋماعى تاريحتا ءتۇرلى ءرول اتقارعان. ءبىراق، وسىناۋ رۋحاني گەوگرافيالىق بەلدەۋدى مەكەن ەتكەن حالىقتىڭ توننىڭ ىشكى باۋىنداي بايلانىسى ەشقاشان ۇزىلمەگەن. ءبىز تاريحىمىزدا وسىناۋ كوركەم، رۋحاني، قاستەرلى جەرلەرىمىزدىڭ ءبىرتۇتاس جەلىسىن بۇرىن- سوڭدى جاساعان ەمەسپىز»، - دەپ جازادى مەملەكەت باسشىسى «ەگەمەن قازاقستان» گازەتىنە شىققان «بولاشاققا باعدار: رۋحاني جاڭعىرۋ» اتتى ماقالاسىندا.
وسى ورايدا ماسەلە ەلىمىزدەگى ەسكەرتكىشتەردى، عيماراتتار مەن كونە قالالاردى قالپىنا كەلتىرۋدە تۇرعان جوق. يدەيانىڭ تۇپكى توركىنى ۇلىتاۋ تورىندەگى جادىگەرلەر كەشەنىن، قوجا احمەت ياساۋي ماۆزولەيىن، تارازدىڭ ەجەلگى ەسكەرتكىشتەرىن، بەكەت اتا كەسەنەسىن، التايداعى كونە قورىمدار مەن جەتىسۋدىڭ كيەلى مەكەندەرىن جانە باسقا دا جەرلەردى ءوزارا ساباقتاستىرا وتىرىپ، ۇلت جادىندا ءبىرتۇتاس كەشەن رەتىندە ورنىقتىرۋدى مەڭزەيدى.
«مۇنىڭ ءبارى تۇتاسا كەلگەندە حالقىمىزدىڭ ۇلتتىق بىرەگەيلىگىنىڭ مىزعىماس نەگىزىن قۇرايدى. ءبىز جات يدەولوگيالاردىڭ اسەرى تۋرالى ايتقاندا، ولاردىڭ ارتىندا باسقا حالىقتاردىڭ بەلگىلى ءبىر قۇندىلىقتارى مەن مادەني سيمۆولدارى تۇرعانىن ەستە ۇستاۋىمىز كەرەك. تيىسىنشە، ولارعا ءوزىمىزدىڭ ۇلتتىق قۇندىلىقتارىمىز ارقىلى عانا توتەپ بەرە الامىز. قازاقستاننىڭ قاسيەتتى جەرلەرىنىڭ مادەني- گەوگرافيالىق بەلدەۋى - نەشە عاسىر وتسە دە ءبىزدى كەز كەلگەن رۋحاني جۇتاڭدىقتان ساقتاپ، امان الىپ شىعاتىن سيمۆولدىق قالقانىمىز ءارى ۇلتتىق ماقتانىشىمىزدىڭ قاينار بۇلاعى. ول - ۇلتتىق بىرەگەيلىك نەگىزدەرىنىڭ باستى ەلەمەنتتەرىنىڭ ءبىرى. سوندىقتان، مىڭجىلدىق تاريحىمىزدا ءبىز العاش رەت وسىنداي اۋقىمدى جوبانى جاساپ، جۇزەگە اسىرۋعا ءتيىسپىز»، - دەپ ناقتىلادى ن. نازاربايەۆ.
بۇل تۇرعىدا بيىل ۇكىمەت جۇرتشىلىقپەن اقىلداسا وتىرىپ، جوبانى ازىرلەۋى كەرەك.
اۆتور: رۋسلان عابباسوۆ
