قازاقستان اسكەرىنىڭ سوعىسقا قابىلەتتىلىك دەڭگەيى جوعارى - ەلباسى
مەملەكەت باسشىسىنا ەلىمىزدىڭ قارۋلى كۇشتەرىنىڭ قازىرگى احۋالى مەن ارميا الدىنا قويىلعان مىندەتتەردىڭ ورىندالۋى جونىندە ەسەپ بەرىلدى.
نۇرسۇلتان نازاربايەۆ قارۋلى كۇشتەردى جاساقتاۋ قارقىندى جۇرگىزىلىپ كەلە جاتقانىنا توقتالىپ، بۇل جۇمىستى جالعاستىرۋ قاجەتتىگىن اتاپ ءوتتى.
«قىستا دا، جازدا دا اسكەري وقۋ- جاتتىعۋ شارالارى وتكىزىلدى. اسكەرىمىزدىڭ سوعىسقا قابىلەتتىلىك دەڭگەيى جوعارى. ءتارتىپ جاقسارعانى بايقالادى»، - دەدى ەلباسى.
قازاقستان پرەزيدەنتى اسكەردى قارۋ- جاراقتىڭ جانە اسكەري تەحنيكانىڭ جاڭا تۇرلەرىمەن قايتا جاراقتاندىرۋ، اسكەري قىزمەتشىلەردى الەۋمەتتىك قامسىزداندىرۋ، ەلىمىزدىڭ اۋماقتىق قاۋىپسىزدىگى مەن اۋە شابۋىلىنا قارسى قورعانىس جۇيەسىن دامىتۋ ماسەلەلەرىنە نازار اۋداردى.
س. جاسۇزاقوۆ مەملەكەت باسشىسىنا اسكەردىڭ سوعىسقا قابىلەتتىگى دەڭگەيىن، قازاقستان اسكەرى قاتارىنداعى ءتارتىپ پەن جيناقىلىقتى ساقتاۋ شارالارىنىڭ اتقارىلۋ بارىسى تۋرالى مالىمدەدى.
«بۇگىندە قارۋلى كۇشتەر قاتارى 93 پايىز دەڭگەيىندە جاساقتالدى. سالىستىرمالى تۇردە الساق، بۇل كورسەتكىش 2015 -جىلى 89 پايىز بولعان ەدى. قازىرگى ۋاقىتتا وفيتسەر، سەرجانت جانە قاتارداعى سارباز قۇرامدارىن جاساقتاۋ ءۇشىن اسكەرگە كەلىسىمشارت بويىنشا شاقىرۋ جۇمىستارى جۇرگىزىلۋدە. مەرزىمدى اسكەري قىزمەت قاتارىنا الىناتىندار سانىن ارتتىردىق. بيىل اسكەردىڭ بارلىق تۇرىنە 34 مىڭعا جۋىق مەرزىمدى اسكەري قىزمەتشىنى شاقىرۋ جوسپارلانىپ وتىر»، - دەدى قورعانىس ءمينيسترى.
نۇرسۇلتان نازاربايەۆ كەزدەسۋ قورىتىندىسى بويىنشا ءبىرقاتار ناقتى تاپسىرمالار بەردى.
