قازاقتىڭ مادەنيەتىن التى تىلدە سويلەتۋ كەرەك - نازاربايەۆ
«ا ق ش- تىڭ «قىرعي- قاباق سوعىس» كەزىندەگى تابىسىنىڭ قوماقتى بولىگى گولليۆۋدتىڭ ەنشىسىندە. ءبىز 21- عاسىردىڭ جاھاندىق كارتاسىندا ەشكىمگە ۇقسامايتىن، دەربەس ورنى بار ۇلت بولامىز دەسەك، «جاھانداعى زاماناۋي قازاقستاندىق مادەنيەت» جوباسىن ىسكە اسىرۋعا ءتيىسپىز.
الەم ءبىزدى قارا التىنمەن نەمەسە سىرتقى ساياساتتاعى ءىرى باستامالارىمىزبەن عانا ەمەس، مادەني جەتىستىكتەرىمىزبەن دە تانۋى كەرەك. بۇل جوبا نەنى كوزدەيدى؟ ءبىرىنشى، وتاندىق مادەنيەت ب ۇ ۇ- نىڭ التى ءتىلى - اعىلشىن، ورىس، قىتاي، يسپان، اراب جانە فرانسۋز تىلدەرىندە سويلەۋى ءۇشىن ماقساتتى ۇستانىم بولۋى شارت. ەكىنشى، ول بۇگىنگى قازاقستاندىقتار جاساعان جانە جاساپ جاتقان زاماناۋي مادەنيەت بولۋعا ءتيىس»، - دەپ جازدى پرەزيدەنت.
مەملەكەت باسشىسىنىڭ ويىنشا، مادەني قازىنالارىمىزدى الەم جۇرتشىلىعىنا تانىستىرۋدىڭ مۇلدەم جاڭا تاسىلدەرىن ويلاستىرۋ كەرەك. مادەني ونىمدەرىمىز تەك كىتاپ تۇرىندە ەمەس، ءارتۇرلى مۋلتيمەديالىق تاسىلدەرمەن دە شىققانى ابزال. بۇل - ۇلتتىق مادەنيتىمىزدى كەڭىنەن تانىتۋدىڭ ءۇشىنشى جولى.
تورتىنشىدەن، اتالعان باستامالارعا اۋقىمدى مەملەكەتتىك قولداۋ جاسالۋى قاجەت. «سىرتقى ىستەر، مادەنيەت جانە سپورت، اقپارات جانە كوممۋنيكاتسيالار مينيسترلىكتەرى جۇيەلى تۇردە، قويان- قولتىق جۇمىس ىستەۋى كەرەك.
بەسىنشى، بۇل جۇمىستا شىعارماشىلىق زيالى قاۋىم، ونىڭ ىشىندە جازۋشىلار وداعى مەن عىلىم اكادەمياسى، ۋنيۆەرسيتەتتەر مەن قوعامدىق ۇيىمدار ۇلكەن ءرول اتقارۋعا ءتيىس. ءبىز زاماناۋي مادەنيەتىمىزدىڭ قانداي وكىلدەرى الەمدىك ارەناعا جول تارتۋى كەرەكتىگىن انىقتاپ الۋىمىز كەرەك. ۇلتتىق مادەنيەتىمىزدىڭ وزىق ۇلگىلەرىن ىرىكتەپ العاننان كەيىن شەتەلدەردە ولاردى تانىستىرۋ راسىمدەرىن وتكىزەمىز»، - دەپ اتاپ كورسەتتى نازاربايەۆ.
پرەزيدەنت اعىمداعى جىلدا جەر جۇزىنە مادەنيەت سالاسىنداعى جەتىستىكتەرىمىزدى ايقىنداپ الۋ قاجەت دەپ سانايدى. سودان سوڭ بىرەگەي باعدارلامانى 5-7 جىلدا تىڭعىلىقتى جۇزەگە اسىرعان ءجون.
«وسىلايشا، مىڭ جىلدىق تاريحىمىزدا ءتول مادەنيەتىمىز تۇڭعىش رەت الەمنىڭ بارلىق قۇرلىقتارىنا جول تارتىپ، باستى تىلدەرىندە سويلەيتىن بولادى»، - دەيدى ەلباسى.
اۆتور: ارمان اسقاروۆ
