بۇگىن - ادامزات بالاسىنىڭ تۇڭعىش رەت عارىشقا ۇشقان كۇنى
بۇل اتاۋلى كۇن 1968 -جىلدىڭ قاراشاسىنان باستاپ حالىقارالىق اۆياتسيا فەدەراتسياسىنىڭ شەشىمىمەن بەكىتىلگەن.
بۇل ەرەكشە كۇن قازىرگى كۇنى عارىش پەن عىلىم سالاسىندا قىزمەت ەتەتىندەردىڭ سالتاناتتى كۇنى بولدى. تۇڭعىش عارىشكەر - يۋري الەكسەيەۆيچ گاگارين بۇل ساپارعا قازاق جەرىندەگى «بايقوڭىر» عارىش ايلاعىنان اتتاندى.
بايقوڭىر باستى عارىش ايلاعىنا اينالدى، ول جەردەن كەڭەستىك كەمەلەر، سوسىن رەسەي مەن شەتەل كەمەلەرى عارىشقا اتتاندى. ال بىرىككەن ۇلتتار ۇيىمىنىڭ باس اسسامبلەياسى 65- سەسسياسىندا 12 -ءساۋىردى - ادامنىڭ عارىشقا ۇشۋىنىڭ حالىقارالىق كۇنى دەپ جاريالادى. «1961 -جىلى 12 -ساۋىردە ادامزات عارىشقا العاش رەت ۇشتى، ول ساپاردى يۋري گاگارين - كەڭەس ازاماتى جاسادى. وسىناۋ تاريحي وقيعا بارشا ادامزاتتىڭ يگىلىگى ءۇشىن عارىش كەڭىستىگىن زەرتتەۋگە جول اشتى»، - دەلىنگەن قاراردا.
وسىعان بايلانىستى ب ۇ ۇ باس اسسامبلەياسى 12 -ءساۋىردى - ادامنىڭ عارىشقا ۇشۋىنىڭ حالىقارالىق كۇنى دەپ جاريالاپ وتىر. وسى اتاۋلى كۇننىڭ قازاقستان ءۇشىن ماڭىزى زور. قازاق جەرىنەن، ياعني بايقوڭىر عارىش ايلاعىنان وسىناۋ ۇلى وقيعانىڭ باستاۋ الۋى ءبىزدىڭ حالقىمىز ءۇشىن ۇلتتىق ماقتانىش پەن سيمۆولدىق مانگە يە.
بۇگىندە قازاقتان شىققان تۇڭعىش عارىشكەر توقتار اۋباكىروۆ، تالعات مۇسابايەۆ جانە ايدىن ايىمبەتوۆ تاۋەلسىز ەلىمىزدىڭ عارىش كەڭىستىگىن باعىندىرۋدا جاڭا ءومىر پاراعىن اشتى. ايتا كەتەيىك، 2015 -جىلدىڭ قىركۇيەگىندە عارىشكەر ا. ايىمبەتوۆ جەر وربيتاسىنا ۇشۋ بارىسىندا ت. اۋباكىروۆ پەن ت. مۇسابايەۆتىڭ عارىشتىق عىلىمي باعدارلامالارىن جالعاستىردى. قازىرگى كەزدە ەلىمىز عارىش قىزمەتى سالاسىندا ءتيىمدى ساياسات جۇرگىزۋدە.
الەمنىڭ عارىش دەرجاۆالارى ءبىزدىڭ سالاداعى بۇل جەتىستىكتەرىمىزدى جوعارى باعالاۋدا جانە قازاقستانمەن بەيبىت ماقساتتا عارىش كەڭىستىگىن يگەرۋ سالاسىندا تىعىز قارىم- قاتىناس جاساۋعا نيەت تانىتىپ وتىر. وسى ورايدا ەلىمىزدە قازىرگى كۇنى عارىشتى يگەرۋگە قاتىستى اۋقىمدى جوبالار جۇزەگە اسىرىلۋدا. قازاقستاندا ۇلتتىق عارىش اگەنتتىگى قۇرىلىپ، ءتيىستى جۇمىستار باستالعالى سالادا كوپ ىلگەرىلەدىك.
اۆتور: رۋسلان عابباسوۆ
