ە ا ە و- نا مۇشە بارلىق ەلدەردى ءبىر دەڭگەيگە كوتەرۋ كەرەك - نازاربايەۆ
دەپ حابارلادى «قازاقپارات» ح ا ا.
«مەن مەملەكەت (ك س ر و - رەد.) ىدىراعان كۇننەن باستاپ، ءبىزدىڭ ەلدەر اراسىنداعى كوپ جىلعى بايلانىستاردى ۇزبەۋگە ۇندەپ كەلدىم. ءيا، ءبىز بارلىعىمىز تاۋەلسىز مەملەكەتتى قۇرا باستادىق، ەگەمەندىك الدىق، اركىم ءوز جولىمەن كەتتى، اركىمنىڭ ءوز ساياساتى بار. ءبىراق كاسىپورىندار اراسىندا وندىرىستىك قارىم- قاتىناستار بولدى، ونسىز ءومىر سۇرۋگە بولمايدى. ءوندىرىس بىردەن تۇرالاپ قالدى. سونىمەن قاتار ادامي قارىم- قاتىناستار بولدى. بىرەۋلەردىڭ بالالارى وزگە مەملەكەتتە وقىپ جاتتى، بىرەۋلەردىڭ تۋىستارى باسقا ەلدە تۇرىپ جاتتى. وسى بايلانىستار ۇزىلمەس ءۇشىن، جاڭا ۇيىمدى قۇرۋ شەشىمى جاسالدى»، - دەپ اتاپ ءوتتى ەلباسى رەسەيلىك ارناعا بەرگەن سۇحباتىندا.
پرەزيدەنتتىڭ ايتۋىنشا، العاشىندا قۇرىلعان ت م د ۇيىمى كوپ قۇجاتتاردى قابىلدادى، دەگەنمەن ول بايلانىستاردى نىعايتۋعا قاۋقارسىز ەدى. سەبەبى مەملەكەتتەر كەلىسىمشارتقا قول قويۋعا دا، قويماۋعا دا قۇقىلى بولاتىن. سونىمەن قاتار ءاربىر مۇشە مەملەكەتتىڭ ءارالۋان ساياساتى دا يگى ىسكە كەسىرىن تيگىزىپ جاتتى.
«بىرەۋلەرى ەلدە قالعان ءوندىرىستى توقتاتىپ قويسا، باسقالارى وزگە جولمەن كەتتى، ۇشىنشىلەرى ءتىپتى ءۇشىنشى باعىتتى تاڭدادى. وسىنىڭ بارلىعىن بىرىكتىرۋ مۇمكىن ەمەس ەدى. سول كەزدە ۇسىنىس تۋدى: بۇدان دا تەرەڭ ىقپالداستىق قۇرساق قايتەدى. بۇل جۇمىس ىستەيتىنىن بارلىعىنا كورسەتەيىك. وسى ماقساتتا ەۋرازيالىق ەكونوميكالىق وداق قۇرىلدى»،- دەپ ەسكە الادى ن. نازاربايەۆ.
«جالپى، مەنىڭ ويىمشا، بۇل دۇرىس باعىت. مەن ونى سىنامايمىن. تاۋار اينالىمى تابيعي سەبەپتەرگە بايلانىستى تومەندەدى. ءبىرىنشى - باتىستىڭ رەسەيگە قارسى سانكسيالارى، ەكىنشى - ءبىزدىڭ ەكسپورتتىق ونىمدەرىمىز: مۇناي، گاز، مەتالل، تىڭايتقىش سياقتى تاۋارلارىمىزدىڭ بيرجالىق باعالارى تومەندەدى. دەمەك، ءبىزدىڭ مەملەكەتتەر اراسىنداعى تاۋار اينالىمنىڭ تومەندەپ كەتۋى - تابيعي پروتسەسس. دەگەنمەن وندىرىستىك تاۋار اينالىمنىڭ فيزيكالىق كولەمى ازايعان جوق، ولار تومەندەپ جاتقان جوق. سوندىقتان اتالمىش كونيۋنكتۋرا تۇزەلگەن كەزدە جانە ءبىز الەمدىك احۋالعا بەيىمدەلە تۇسكەن شاقتا، ول جۇمىس ىستەپ كەتەدى»، - دەپ جالعاستىردى ەلباسى.
مەملەكەت باسشىسىنىڭ ايتۋىنشا، بۇل بىرلەستىكتىڭ پايداسى مول. بىرىنشىدەن، كەدەندىك كەدەرگىلەر جوق. تاۋارلار ەش بوگەلىسسىز، ەش قيىندىقسىز ءبىر ەلدەن، ەكىنشى ەلگە وتە الادى. بىرلەسكەن كاسىپورىندار رەسەيدە، بەلارۋستا جانە وزگە دە مەملەكەتتەردە قۇرىلا الادى.
«بۇل جاقسى، ءبىراق ماسەلە باسقادا: ە ا ە و بارلىق مۇشەلەرىن ءبىر دەڭگەيگە كوتەرۋ كەرەك. ءبىرى دامۋ جاعىنان وزىپ كەتكەن بولسا، ەكىنشىسى ورتاشا، ءۇشىنشىسى ءتىپتى قالىپ قويعان. پروبلەما وسىندا. بىزگە جان- جاقتى جۇمىس ىستەۋ ءۇشىن دەڭگەيىمىزدى سايكەستەندىرىپ العان ءجون»، - دەپ ءتۇيدى ويىن نۇرسۇلتان نازاربايەۆ.
اۆتور: جاسۇلان جولدىبايەۆ
