بەكبولات تىلەۋحان: جالاقىنىڭ ارتقانى قۋانتادى، ءبىزدىڭ دە بالا-شاعامىز بار
جاڭا قارجىلىق وزگەرىسكە قاتىستى دەپۋتاتتاردىڭ وزدەرى نە دەيدى؟
بۇل تۋرالى saigez.kz حابارلايدى.
كەشە ق ر پارلامەنت ءماجىلىسى ءتوراعاسىنىڭ ورىنباسارى ۆلاديمير بوجكو دەپۋتاتتار جالاقىسىنىڭ وسىمىنە قاتىستى ءوز پىكىرىن ءبىلدىردى.
«ساياسي قىزمەتكەرلەر اراسىندا جالاقىسى سوڭعى بوپ وسكەن وسى دەپۋتاتتار، نەگىزى بۇل شەشىم وسىدان 4 جىل بۇرىن قابىلدانىپ قويىلعان ەدى. مينيسترلىكتەر مەن وزگە دە ۆەدومستۆولارداعى جالاقىنى بىرتىندەپ وسىرەمىن دەگەنشە 4 جىل ءوتىپ كەتتى. مىنە، ەندى ءبىزدىڭ كەزەگىمىز كەلدى»، - دەيدى ۆلاديمير بوجكو.
ونىڭ ايتۋىنشا، ساياسي قىزمەتكەرلەردىڭ ءبارى بىردەي جالاقى الۋى ءتيىس. ال، ءبىزدىڭ ەلدە دەپۋتاتتار ساياسي مەملەكەتتىك قىزمەتكەرلەر بولىپ ەسەپتەلەدى.
باسقا دا ءماجىلىس دەپۋتاتتارى جالاقى توڭىرەگىندە قىسقاشا پىكىرلەرىن ايتتى.
«دەپۋتاتتار دا مەملەكەتتىك قىزمەتكەر. حالىقتىڭ مۇڭىن ايتۋ كەرەك. ولاردىڭ موينىنا ارتقان جاۋاپكەرشىلىك كوپ. جاۋاپكەرشىلىگىنە وراي ءوزىنىڭ ەڭبەكاقىسىن الۋ كەرەك دەپ ويلايمىن. جالاقىسى كوبەيسە قۋانبايتىن ادام بولا ما؟! ءبىز دە پەندەمىز، ءبىزدىڭ دە بالا-شاعامىز بار، بىزگە دە قاجەتتىلىك بار»، - دەيدى ءماجىلىس دەپۋتاتى بەكبولات تىلەۋحان.
وليمپيادا چەمپيونى، قازىر حالىق قالاۋلىسى ولگا شيشيگيناعا دا جالاقىنىڭ ارتۋى مايداي جاققان.
«ءبىر جاعىنان وتە قۋانىشتى جاڭالىق. ەكىنشى جاعىنان، جالاقىسىن كوتەرۋگە بولاتىن باسقا دا مۇقتاج ادامدار بار. ماسەلەن، دارىگەرلەر مەن مۇعالىمدەر»، - دەدى ول.
بۇعان دەيىن ەلىمىزدە دەپۋتاتتاردىڭ جالاقىسى كوتەرىلەتىنى تۋرالى ايتىلعان ەدى.
