قازاقستانداعى ءاربىر گازەتتىڭ ەلەكتروندى نۇسقاسى كىتاپحانالارعا بەرىلەتىن بولادى
بۇل تۋرالى پارلامەنت سەناتى الەۋمەتتىك-مادەني دامۋ جانە عىلىم كوميتەتىنىڭ كەڭەيتىلگەن وتىرىسىندا ق ر ءماجىلىس دەپۋتاتى مايرا ايسينا ءمالىم ەتتى، دەپ حابارلايدى قازاقپارات.
وتىرىس بارىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مادەنيەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلاندى.
باستاماشىلار اتىنان دەپۋتات م. ايسينا زاڭ جوباسىنداعى نەگىزگى تۇزەتۋلەردى تانىستىردى.
«وزدەرىڭىز بىلەسىزدەر، اتالعان زاڭ جوباسىن ەنگىزگەندە وعان دەپۋتاتتار باستاماشىلىق ەتكەن ەدى. وسى ورايدا ەڭ ماڭىزدى ماسەلەلەرگە توقتالىپ وتكىم كەلەدى. ۇلتتىق مەملەكەتتىك كىتاپ پالاتاسى كوپتەن بەرى جۇمىس ىستەپ جاتقانى بەلگىلى. دەگەنمەن دە ونىڭ مارتەبەسى ايقىندالماعان ەكەن. قولدانىستا مادەنيەت، ارحيۆتەر، بۇقارالىق اقپارات قۇرالدارى تۋرالى زاڭنامالار بار، ءبىراق تا ەشبىرىندە كىتاپ پالاتاسىنىڭ مارتەبەسى قارالماعان. ونىڭ جۇمىسى قازاقستان حالقىنىڭ مادەني مۇراسىنا جاتاتىن باسپا ءسوز باسىلىمدارىن ساقتاۋدا جانە كەڭىنەن تانىتۋدا ماڭىزدىلىعى زور. ەكىنشى ماسەلەگە توقتالاتىن بولساق، ەلىمىزدە ەكى ۇلتتىق كىتاپحانا بار. ولارعا باسىلىمداردىڭ ءبىر داناسى مىندەتتى تۇردە بەرىلىپ وتىرادى. ەندى سول مىندەتتى ۇلتتىق مەملەكەتتىك كىتاپ پالاتاسىنا دا بەرۋدى ەسكەردىك، سونداي-اق ەلەكتروندىق نۇسقالاردى «ورتالىق» مارتەبەسىنە يە كىتاپحانالارعا ۇسىنۋ زاڭ جوباسىندا قامتىلعان. وبلىستاردا «ورتالىق» مارتەبەدەگى كىتاپحانالار بار، الايدا اۋداندار مەن اۋىلداردا شىعىپ جاتقان گازەتتەر جوعالماسىن دەپ، سول كىتاپحاناعا ەلەكتروندى نۇسقادا تاپسىرۋ قاجەت دەپ سانايمىز»، - دەدى دەپۋتات.
ودان باسقا، زاڭ جوباسىمەن مادەنيەت مەكەمەلەرى مەن تەاترلار قىزمەتىنە قاتىستى ماسەلەلەردى رەتتەۋ، قوعامدىق ماڭىزى بار ادەبيەتتەردى ساتىپ الۋ، باسۋ جانە تاراتۋ، سونداي-اق مادەنيەت سالاسىنىڭ ۋاكىلەتتى ورگاندارىنىڭ قۇزىرەتىن ناقتىلاۋ ۇسىنىلىپ وتىر.
اۆتور: رۋسلان عابباسوۆ
