ساراپشى شەنەۋنىكتەردىڭ نە ءۇشىن مەشىتكە اياق كيىمىن «شەشپەي» كىرگەنىن ايتتى
بۇل ماسەلەنى كوپشىلىككە يسلامتانۋشى ەرشات وڭعاروۆ ءتۇسىندىرىپ بەردى.
«مەشىتكە ەشقانداي «شەنەۋنىك» ەلىمىز تاۋەلسىزدىك العان جىلداردان بەرى اياقكيىممەن كىرىپ ارالاعان ەمەس. ىلايىم بۇدان كەيىن دە سولاي بولادى. ال، كوپشىلىكتىڭ تالقىسىنا ءتۇسىپ، داۋ تۋدىرعان سۋرەتكە كەلسەك، ول - مەشىتكە كەلەتىن رەسمي قوناقتارعا ارنالعان سۇيرەتپە (تاپىشكە).
شالباردىڭ بالاعىنان شىعىپ تۇرعان تۇمسىعى تۋفليگە ۇقساعان سۇيرەتپە سىرت كوزگە اياق كيىم بولىپ كورىنۋى مۇمكىن. الايدا بۇل سۇيرەتپەلەر مەشىتتىڭ ىشكى ءتارتىبى مەن ادەبىنە، مەشىت درەسس-كودىنا ساي تازا كيىم بولىپ سانالادى. وسىعان ۇقساعان سۇيرەتپەلەردى مەشىت قىزمەتكەرلەرى دە كيەدى»، - دەپ جازادى ول.
مەشىت - جەر بەتىندە قۇلشىلىق جاساۋعا ارنالعان قاسيەتتى ورىن، اللانىڭ ءۇيى. سوندىقتان، ءاربىر مۇسىلمان بالاسى قاسيەتتى ورىننىڭ قۇرمەتىن ساقتاۋى ءتيىس. مەشىتكە كەلۋشىنىڭ كيىمىنىڭ تازا ءارى ادەمى بولۋى مەشىت ادەبىنە جاتادى. بۇل جايىندا اللا تاعالا قۇران كارىمدە: «ۋا، ادامنىڭ ۇرپاقتارى! مەشىتكە كەلگەندە اسەم كيىنىڭدەر...»، - دەپ بۇيىرعان (ءال- اعراف سۇرەسى، 31-ايات).
ياعني، مەشىتكە كەلگەندە كيىمىڭىز اسەم، تازا بولۋى ءتيىس. كيىمگە قاتىستى ەڭ باستى شارت - دەنەنى جالاڭاشتاماي كيىم كيۋ جانە ونىڭ تازا بولۋى. ال، داۋ تۋدىرعان سۇيرەتپەلەر مەشىت ىشىندە قولدانۋعا عانا ارنالعان تازا كيىم بولىپ تابىلادى.
سونداي-اق، ساراپشى: «قۇرمەتتى اعايىن، سىزدەردەن وتىنەرىم: ءبىر ماسەلەنىڭ بايىبىنا بارىپ، اق-قاراسىن اجىراتىپ المايىنشا كورىنگەننىڭ ايتقانىنا كوڭىل بولمەسەڭىزدەر ەكەن. مۇنداي ەلدى ارانداتۋشى اقپاراتپەن الداپ وتىرعاندار بار. ولار وزدەرىن دىنگە جاناشىر، تاقۋا ەتىپ كورسەتكەنىمەن، تەرىس پيعىلدى بولۋى مۇمكىن. شاريعات ىلىمدەرىندە ءپاتۋا ايتۋعا ءبىلىمى دە، قۇقى دا جوق كىسىلەردىڭ ايتقانىمەن ءجۇرۋ اقيقاتتى ىزدەۋگە جاتپايدى»، - دەپ، جۇرتتى الىپ- قاشپا اڭگىمەگە سەنە بەرمەۋگە شاقىرادى.
