زايساندا باعاسى ەڭ ارزان تراكتورلار قۇراستىرىلىپ جاتىر
زايسان اۋدانى اكىمدىگى 2015 -جىلى قىتاي كاسىپكەرلەرىمەن وسى ەلدە شىعارىلاتىن شاعىن تراكتوردى زايساندا قۇراستىرۋ جونىندە كەلىسىمگە كەلىپتى. سونىڭ ناتيجەسىندە اۋىلشارۋاشىلىق تەحنيكالارى مەن ونىڭ قۇرىلعىلارىن قۇراستىرىپ، ساتاتىن «ەرتىس ت ز» اتتى ورتالىق قۇرىلىپتى.
بىلتىرعى جىلدان باستاپ ىسكە كىرىسكەن بۇل ورتالىق ازىرگە 36 شاعىن تراكتور شىعارىپ ۇلگەرگەن. ءىستىڭ قازىرگى بەتالىسى جامان ەمەس. 20-26 اتتىڭ كۇشى بار 15 شاعىن تراكتور ساتىلىپ ۇلگەرىلگەن. باعالارى دا قىمبات ەمەس. 800 مىڭ - 1 ميلليون تەڭگە اينالاسىندا. بۇدان 14,6 ميلليون تەڭگە قارجى تۇسكەن. سول سەكىلدى ءتۇرلى قۇرىلعىلار ساتۋدان 4,8 ميلليون تەڭگە قارجى كىرگەن.
اتالعان شاعىن كاسىپورىن ەندىگى كەزەكتە موتوسيكلدەر، كۇن باتارەيالارىن، كيىز ۇيلەر قۇراستىرۋ مەن جاساۋدى دا جوسپارلاپ وتىرعان كورىنەدى.
«ەرتىس ت ز» ج ش س- نىڭ قۇرىلىپ، جۇمىس ىستەۋى ءۇشىن 80 ميلليون تەڭگە ينۆەستيتسيا تارتىلعان ەكەن. وسىعان وراي اۋدان ورتالىعىندا 12 جاڭا جۇمىس ورنى اشىلعان. جۇمىس ورىندارىنىڭ سانى الداعى ۋاقىتتا ارتا بەرەدى دەگەن بولجام بار.
زايساندا جاڭا تراكتورلار شىعارىلىپ جاتقاندىعىن ەستىگەن كورشى اۋداننىڭ كاسىپكەرلەرى مەن جۇرتشىلىعى دا بۇل قۋانىشتى جاڭالىققا ەلەڭ ەتىسىپ، قازىرگى كۇنى ءوز ۇسىنىستارىن ايتىپ جاتقان كورىنەدى. ول ۇسىنىستار جيناقتالىپ، زەرتتەلىنۋدە. ماسەلەن، نەعۇرلىم قۋاتتىراق، 35-40 اتتىڭ كۇشى بار تراكتورلار شىعارىلسا، دەگەن دە ۇسىنىستار بار ەكەن.
ارينە، ەگەر جاقسى سۇرانىس بولىپ جاتسا، ونى دا قاناعاتتاندىرۋعا بولادى. ءسويتىپ، قۇرىلعانىنا كوپ وتە قويماعان ج ش س- نىڭ جۇمىسى تراكتورلاردىڭ جاڭا تۇرلەرىمەن تولىعىپ، اۋقىمى كەڭەيە ءتۇسۋى دە ابدەن مۇمكىن.
