اقجارقىن تۇرلىباي كەزەكتى تۋعان كۇنىن تاعى دا قىتاي تۇرمەسىندە قارسى الدى
بۇل تۋرالى NUR. KZ ءتىلشىسى حابارلايدى.
اقجارقىن تۇرلىبايدىڭ اناسى زۋحرا سەيتىموۆانىڭ ايتۋىنشا، قىزىنىڭ ادۆوكاتتارى ءالى قانداي دا ءبىر حابار بەرمەپتى.
«قىزىم اقتالىپ شىعادى دەگەن ءۇمىتىم ءالى سونگەن جوق. اقتالىپ شىعاتىن شىعار... ەلەڭدەپ وتىرمىز. ادۆوكاتىمەن حابارلاسقانىمدا، ەش جاڭالىق ايتقان جوق. تەك تۋعان كۇنىندە كەزدەسىپ، ونىڭ كارتوچكاسىنا اقشا اۋدارىپتى. جاعدايى جاقسى دەپ وتىر»، - دەيدى اقجارقىننىڭ اناسى زۋحرا.
اقجارقىن تۇرلىباي 2014-جىلدىڭ 9- ناۋرىزىندا ەسىرتكى تاسىمالدادى دەگەن ايىپپەن قىتاي تۇرمەسىنە توعىتىلدى. كەيىن قازاقستاندىق بويجەتكەندى ءومىر بويىنا باس بوستاندىعىنان ايىرۋ تۋرالى ۇكىم شىقتى.
قىزدىڭ اتا-اناسى مەن قورعاۋشىلارىنىڭ ايتۋىنشا، اقجارقىن تۇرلىباي نيگەريالىق ەسىرتكى كونترابانداسىمەن اينالىسقان توپتىڭ قۇربانى بولعان. ول تۇنگى كلۋبتا جۇمىس ىستەپ جۇرگەن تانىستارىنىڭ نۇسقاۋىمەن قىتايدىڭ گۋانجوۋ قالاسىنان زات تاسۋعا بارىپ، ەسىرتكىمەن ۇستالدى.
اقجارقىننىڭ اناسى زۋحرا سەيتىموۆا اي سايىن قىزىنىڭ تاماعىنا اقشا اۋدارىپ تۇرادى. ويتكەنى، قىتاي تۇرمەسىندە جازاسىن وتەۋشىلەرگە تۇرمىستىق قالدىقتار وڭدەلىپ، تاماق رەتىندە بەرىلەدى ەكەن.
تۇڭعىش قىزىن قۇتقارامىن دەپ جانۇشىرعان اتا-اناسى بىرنەشە نەسيە الىپ، ۇيلەرىن دە ساتىپ جىبەرگەن. ولار قازاقستان مەن قىتاي ديپلوماتتارى كەلىسىپ، اقجارقىندى ەلگە قايتارادى دەگەن ۇمىتپەن وتىر.
ال اقجارقىن تۇرلىباي كەزەكتى تۋعان كۇنىن تۇرمەدە قارسى الدى. 21- اقپان كۇنى 23 جاسقا تولعان بويجەتكەن قىتاي ءتىلىن مەڭگەرىپ العان. سونداي-اق، ول تۇرمەدە قوسىمشا جۇمىس ىستەپ، تابىس تاۋىپ ءجۇر.
