باسپانا سالۋ ءۇشىن قانداي قۇجاتتار كەرەك؟

باسقاسىن بىلاي قويعاندا ءتيىستى قۇجاتتاردى دۇرىس راسىمدەۋ ماسەلەسىنە اسا ءمان بەرگەن ءجون. ول ءۇشىن مىناداي قۇجاتتار بولۋى ءتيىس:

♦ قۇرىلىس جۇمىستارىن باستاۋ ءۇشىن ءتيىستى مەكەمەگە ءوتىنىم بەرەسىز. وتىنىشكە مىناداي قۇجاتتار قوسا تىگىلۋى ءتيىس:

- جەرگىلىكتى بيلىك باسشىسىنىڭ جەر تەلىمىن بەرۋ تۋرالى قاۋلىسى؛

- ساتۋ- ساتىپ الۋ كەلىسىم- شارتى؛

- باس جوسپار، جەر تەلىمىنىڭ ءتولقۇجاتى؛

- جەر تەلىمىنىڭ شەكاراسى، وندا سالىناتىن عيماراتتار تۋرالى اكت.

♦ وسىدان كەيىن بۇل قۇجاتتاردى تەكسەرىپ كورگەن اكىمشىلىك ءۇي سالۋعا رۇقسات بەرۋ جونىندە قاۋلى شىعارادى. مىناداي قۇجاتتار راسىمدەلەدى:

- اكىمشىلىكتىڭ قاۋلىسى؛

- ءۇي سالۋشىعا قۇقىق بەرىلەتىن قۇجات؛

- باس جوسپاردان ءۇي سالۋعا بەرىلەتىن قۇجات كوشىرمەسى؛

- سيتۋاتسيالىق جوسپار؛

- ينجەنەرلىك جۇيەلەرگە قوسىلۋعا قاتىستى تەحنيكالىق جاعدايلار، فاساد، قابات سىزبالارى؛

- جەر تەلىمىنىڭ سالىناتىن ءتۇرلى عيماراتتارعا قاتىستى سىزباسى.

♦ بۇدان بولەك، سالىناتىن ءۇي جوسپارى جەكە قۇجاتقا تىگىلەدى. وندا مىناداي قۇجاتتار بولادى:

- سيتۋاتسيالىق جوسپار، مۇندا ءۇيدىڭ جاقىن ەلدى مەكەنگە بايلانىسى، سىرتقى جارىق، جىلۋ، سۋ كوزدەرىمەن كارىز جۇيەلەرىمەن، قۇرىلىستارىمەن بايلانىسى كورسەتىلەدى؛

- ءۇيدىڭ جاقىن كوشە بولىگىمەن قوسا «توپوسەمكالىق» سۋرەتى؛

- جەر تەلىمىنىڭ جاقىن اۋماققا بايلانىسىن كورسەتەتىن تىگىنەن جاسالعان سىزباسى؛

- جەرتولە مەن قاباتتار جوسپارى؛

- عيماراتتىڭ ءبۇيىر جانە باس فاسادتارى؛

- سايكەس بولىكتەر؛

- قاباتتاردىڭ جابىلۋىنا قاتىستى جوسپار، شاتىردىڭ، جابىندىنىڭ جوسپارى؛

- ىرگەتاس جوسپارى، ونىڭ قيىلىس- بۇرىلىستارىنىڭ جوسپارى؛

- تەحنيكالىق- ەكونوميكالىق كورسەتكىشتەرىنە قاتىستى جازبالار، عيمارات قۇنىنا قاتىستى قارجىلىق- سمەتالىق ەسەپتەۋلەر.

♦ ال جەر تەلىمىن قۇجاتتاندىرۋ ءۇشىن ءتيىستى مەكەمەگە ول جەرگە نە سالىناتىنىن، قاي اۋماقتا ەكەنىن، كولەمىن كورسەتىپ، جەكە باستى راستايتىن قۇجات كوشىرمەسىن، ساتۋ- ساتىپ الۋ تۋرالى كەلىسىم- شارتتى، ازاماتتىڭ جەر تەلىمىنە قۇقىق كورسەتەتىن قۇجاتتى، كاداسترلىق جوسپاردى قوسا تىگىپ، ءوتىنىش وتكىزۋ كەرەك.

♦ ەستە ۇستار جايت، مەملەكەتتىك مەنشىكتى رەتتەۋ ورگانىنا ءوتىنىش تاستاپ (پاسپورت كوشىرمەسىمەن بىرگە) ، جەر بۇعان دەيىن جەكەشەلەندىرىلگەن بە - سونى ءبىلۋ كەرەك. جەر تەلىمى ءوز اتىنا راسىمدەلگەسىن ءوتىنىش بەرۋشىگە شەشىم قۇجاتى تاپسىرىلادى. جەردى ولشەۋ، كاداسترلىق جوسپار جاساۋعا كەتەتىن شىعىندى جەر يەسى وتەيدى. سوسىن مەملەكەت تاراپىنان جەر تەلىمىنە قاتىستى ساتۋ- ساتىپ الۋ كەلىسىم- شارتى جاسالادى.

(ءوتىنىش بەرۋشىگە جەر تەلىمى مۇراگەرلىكپەن قالعان نەمەسە مەملەكەت تاراپىنان تەگىن بەرىلگەن بولسا، قۇجات باسقاشا راسىمدەلەدى). بۇدان كەيىن تىركەۋگە ءوتىنىش بەرىلەدى. مىناداي قۇجاتتار قوسا تىگىلۋى كەرەك: ءتولقۇجات كوشىرمەسى، جەرگىلىكتى اتقارۋشى بيلىكتىڭ جەر تەلىمىن بەرگەنى تۋرالى شەشىم كوشىرمەسى، ساتۋ- ساتىپ الۋ كەلىسىم- شارتى، جەردىڭ راستالعان كاداسترلىق جوسپارى. پاسپورتتان باسقا قۇجاتتار ءتۇپنۇسقا جانە كوشىرمە تۇرىندە وتكىزىلۋى ءتيىس.

Zamana.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى