دەپۋتاتتار استانانىڭ اتاۋىن وزگەرتۋ ۇسىنىسىن قايتا كوتەردى
بۇگىن وتكەن پارلامەنت پالاتالارىنىڭ بىرلەسكەن وتىرىسىندا دەپۋتاتتار كونستيتۋتسياعا وزگەرىستەر ەنگىزۋ تۋرالى ۇسىنىستارىمەن ءبولىستى. سونىڭ ءبىرى - استانا اتاۋىن وزگەرتۋ. سەناتور دارحان كالەتايەۆ استانانىڭ اتاۋىن نازاربايەۆتىڭ قۇرمەتىنە وزگەرتۋ جونىندە باستاما كوتەردى.
"مەن 2008 -جىلى استانا حالىقارالىق اۋەجايىن تۇڭعىش پرەزيدەنت - ۇلت كوشباسشىسى نۇرسۇلتان نازاربايەۆتىڭ قۇرمەتىنە اتاۋدى ۇسىنعان بولاتىنمىن. اتالمىش ۇسىنىس قوعام اراسىندا قىزۋ تالقىلاندى جانە سول كەزدە ەداۋىر قولداۋعا يە بولدى. سوندىقتان تۇڭعىش پرەزيدەنت ەسىمىن ەلوردا اتاۋىندا جانە ەلىمىزدىڭ وزگە دە نىساندارىندا كورىنىس تابۋى تۋرالى ۇسىنىستار دەر ۋاقىتىندا ايتىلىپ وتىر جانە بۇگىندە وتە وزەكتى"، - دەدى دارحان كالەتايەۆ
ارىپتەسىنىڭ بۇل ۇسىنىسىن دەپۋتات پاۆەل كازانتسيەۆ تا قولدادى.
ونىڭ ويىنشا، بۇل باستاما ەلباسىنىڭ مەملەكەت تاۋەلسىزدىگى جىلدارى قوسقان ۇلەسى مەن ەڭبەگىنە بەرىلگەن ءادىل باعا.
ايتا كەتەيىك، بۇگىن پارلامەنتتىڭ بىرلەسكەن «قازاقستان رەسپۋبليكاسى كونستيتۋتسياسىنا وزگەرتۋلەر مەن تولىقتىرۋلار ەنگىزۋ تۋرالى» ق ر زاڭىنىڭ جوباسى تالقىلانۋدا. وتىرىس بارىسىندا ق ر پرەزيدەنتى بايانداما جاسادى.
ەستەرىڭىزگە سالايىق، استانا قالاسىنىڭ اتاۋىن وزگەرتۋ تۋرالى ماسەلە دەپۋتاتتار تاراپىنان بۇعان دەيىن دە كوتەرىلىپ، ءبىراق مەملەكەت باسشىسى وعان ءوزىنىڭ قارسىلىعىن جەتكىزگەن بولاتىن.
اۆتور: جاسۇلان جولدىبايەۆ
