پارلامەنتكە پرەزيدەنتتىڭ بۇكىل زاڭ شىعارۋ وكىلەتتىگى بەرىلەدى - سابيليانوۆ
بۇل تۋرالى ق ر پارلامەنتى ءماجىلىسىنىڭ دەپۋتاتى نۇرتاي سابيليانوۆ ءمالىم ەتتى، دەپ حابارلايدى قازاقپارات.
«جالپى، كونستيتۋتسياعا ەنگىزىلەتىن وزگەرىستەر مەن تولىقتىرۋلارعا بايلانىستى پرەزيدەنتتىڭ كەيبىر وكىلەتتىكتەرى پارلامەنت پەن ۇكىمەتكە بەرىلەدى. اتاپ ايتاتىن بولساق، پارلامەنتكە پرەزيدەنتتىڭ بۇكىل زاڭ شىعارۋ وكىلەتتىگى بەرىلەتىن بولادى. بۇل پارلامەنتتىڭ ءرولىن كۇشەيتەدى»، - دەدى ول قوس پالاتانىڭ بىرلەسكەن وتىرىسى اياسىندا ب ا ق وكىلدەرىنىڭ ساۋالىنا وراي.
دەپۋتاتتىڭ اتاپ وتۋىنشە، ۇكىمەتكە ەكونوميكانى باسقارۋ، ياعني مەملەكەتتىك باعدارلامالاردى بەكىتۋ، ونىڭ ورىندالۋىن قامتاماسىز ەتۋ قىزمەتى جۇكتەلەتىن بولادى.
«مەنىڭ ويىمشا، بۇل ۇكىمەتتىڭ حالىق الىنداعى، پارلامەنت الدىنداعى جاۋاپكەرشىلىگىن ارتتىرادى. جالپى پارلامەنتتىڭ باقىلاۋ قىزمەتىنىڭ كەڭەيۋىنىڭ دە اسەرى ۇلكەن بولادى. ويتكەنى، ۇكىمەت پارلامەنتكە ءوزىنىڭ شەشىمدەرى تۋرالى، نەگىزگى باعىتتارى تۋرالى بايانداپ وتىرادى. سول كەزدە ءبىز شەشىمدەردى وزگەرتۋگە ىقپال ەتە الاتىن بولامىز. جالپى ەلىمىزدىڭ دامۋىنا بۇل وزگەرىستەر ۇلكەن اسەرىن بەرەدى»، - دەدى سابيليانوۆ.
اۆتور: مارلان جيەمباي
