شىمكەنتتە جاڭا تۋعان ءسابيىن كوشەگە تاستاپ كەتكەن ايەل ۆيدەوعا ءتۇسىپ قالدى - كەسكىن

ۆيدەودا كيىمىن بۇركەنىپ كيگەن ايەلدىڭ ارەڭ ءجۇرىپ بارا جاتقانى بايقالادى.

بۇل تۋرالى otyrar.kz حابارلايدى.

ۆيدەوداعى ايەلدىڭ ءسابي تابىلار ۋاقىتتان بۇرىن وتكەنى بولجاندى. ۇزىن كۇرتە كيگەن ايەل الدىمەن جەدەل جاردەم كولىگىنەن جاسىرىنعانداي بولادى. كەيىن تەزدەتىپ تاساعا بارادى. جاڭا تۋعان سابيدە سول جەردەن تابىلعان.

بالانى ءدال وسى ايەلدىڭ بوسانىپ، تاستاپ كەتكەن بولۋى مۇمكىن. ءسابي ءبىر ساعاتتان اسا ۋاقىت جاڭبىر استىندا قالىپ قويعان. دارىگەرلەر 4 ميىنۋت بويى قىز بالانى امان الىپ قالۋ ءۇشىن كۇرەستى.

جالعاس ۋسەنحانوۆ سەنبى كۇنگى وقيعانى ءالى دە قورقىنىشپەن ەسكە الادى. ءسابيدى تەرەزەدەن كورىپ قالىپ، كومەككە ۇمتىلعان دا سول. قىز بالا سۋىقتاپ قالعاندىقتان، تىنىس الۋى ناشارلاعان.

«مەن كولىگىمدى تۇراققا قويىپ، عيماراتقا كىرسەم، كوپشىلىك تەرەزەدەن قاراپ «بالا جاتىر» دەپ داۋرىعىپ جاتىر ەكەن. قاراسام شىنىندا دا بالا جاتىر. دالاعا جۇگىرە شىعىپ، ءسابيدى كوتەرگەن بويدا جانساقتاۋ بولىمىنە الىپ كىردىم. ول بەتون ۇستىندە ءبىر ساعاتتان اسا قالىپ قويعان»، - دەيدى جالعاس ۇسەنحانوۆ.

قازىر قىز بالا جاساندى تىنىس الۋ اپپاراتىمەن دەمالۋدا.

ايتا كەتەيىك، سەنبى كۇنى جەكە مەديتسينالىق ورتالىقتىڭ كۇزەتشىسى قوقىس تاستايتىن جاشىك پەن بانكوماتتىڭ اراسىنان جاڭا تۋعان ءسابيدى تاۋىپ العان بولاتىن. قانسىراعان ءسابيدى اناسى بوسانعان كۇيى تاستاپ كەتكەن دەگەن بولجام جاسالعان-دى. كۇزەتشىلەر تەز ارادا جەدەل جاردەم كولىگىن شاقىرتىپ، ءسابي پەريناتالدىق ورتالىققا جەتكىزىلگەن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى