ىقتيارحاتپەن كەلگەن قانداستار قالاي تىركەلەدى؟

تىركەۋگە تۇرماعان ادامعا 10 ا ە ك (23 مىڭ تەڭگەگە جۋىق) كولەمىندە ايىپپۇل سالىنادى. كوشى- قون زاڭدارىنا ەنگىزىلگەن جاڭا ەرەجە قوعامدا ءجيى تالقىلانعان وزەكتى تاقىرىپقا اينالدى. وسى رەتتە ىقتيارحاتپەن جۇرگەن

قانداستارىمىزدى ۋاقىتشا تىركەۋگە الۋ قالاي جۇزەگە اسۋدا دەگەن زاڭدى سۇراق تۋىندايدى.

ىقتيارحات - شەت ەل ازاماتتارىنا 10 جىلعا نەمەسە 5 جىلعا بەرىلەتىن قۇجات. ياعني، ازاماتتىق العانعا دەيىن تۇراقتى تىركەۋگە تۇرۋعا مۇمكىندىك بەرەدى. شەت ەل ازاماتتارى ىقتيارحاتتىڭ كومەگىمەن شەكارادان ۆيزاسىز شىعۋىنا، ەركىن ءجۇرىپ-تۇرۋىنا مۇمكىندىك الادى. ىشكى ىستەر ءمينيسترىنىڭ 2015 -جىلعى 7 ساۋىردەگى №315 بۇيرىعىندا «شەتەلدىكتەر مەن ازاماتتىعى جوق ادامداردى تىركەۋ جانە ولارعا قازاقستان رەسپۋبليكاسىندا تۇراقتى تۇرۋعا رۇقسات بەرۋ»، «ازاماتتىعى جوق ادامدارعا كۋالىكتەر جانە قازاقستان رەسپۋبليكاسىندا تۇراقتى تۇراتىن شەتەلدىكتەردىڭ تۇرۋىنا ىقتيارحات بەرۋ»، «قازاقستان رەسپۋبليكاسىنىڭ ازاماتتىعىن الۋدى جانە ودان شىعۋدى تىركەۋ» ماسەلەلەرى ايتىلىپ، بەكىتىلگەن بولاتىن.

ماسەلەن، قىتاي حالىق رەسپۋبليكاسىنان ەلىمىزگە ورالعان قانداسىمىز، الماتى قالاسىنداعى «حالىقارالىق قازاق- قىتاي كوللەدجىنىڭ» 2- كۋرس ستۋدەنتى جۇپار دۇيسەنبەك «ىقتيارحات الاردا تۇرعىلىقتى مەكەن- جايىم بويىنشا كوشى قون پوليتسياسى ارقىلى اۆتوماتتى تۇردە تۇراقتى تىركەۋگە تۇردىم. تۇرعىلىقتى جەرىم - الماتى وبلىسىنىڭ شەلەك اۋىلى. الماتى قالاسىندا وقيتىندىقتان العاشىندا ۋاقىتشا تىركەۋ ماسەلەسى شىققاندا ازاماتتىق الا قويماعان بىزدەر ءۇشىن ۋاقىتشا تىركەۋگە تۇرۋ قالاي بولماق دەپ الاڭداعانىم راس. اركىم ءار ءتۇرلى ايتادى. وسىعان قاتىستى ناقتى اقپاراتتار بەرىلىپ، ءتۇسىندىرۋ جۇمىستارى جۇرگىزىلسە»، دەيدى.

وسى سۇراققا جاۋاپ الۋ ماقساتىندا الماتى قالاسىنداعى وسى ماسەلەگە جاۋاپتى ماماندار كەڭەسىنە جۇگىنگەن ەدىك. حالىققا قىزمەت كورسەتۋ ورتالىقتارىنا حابارلاسقانىمىزدا، اتالعان سۇراققا جاۋاپ بەرە المايتىندارىن ايتىپ، كوشى- قون پوليتسياسىنا باعىتتادى.

الماتى قالالىق كوشى- قون پوليتسياسى باسشىسىنىڭ ورىنباسارى، پولكوۆنيك جاندوس تۇرىسبەكوۆ ۋاقىتشا تىركەۋ ماسەلەسىنىڭ ىقتيارحاتپەن جۇرگەن قانداستارىمىزعا ەشقانداي قاتىسى جوقتىعىن ايتادى. «ازاماتتىق الماعان قانداستارىمىزدىڭ تىركەلۋ ماسەلەسى بۇرىنعى قالپىندا رەتتەلەدى. ىشكى ىستەر مينيسترلىگىندە وسىعان قاتىستى ءبىراز اڭگىمەلەر بولعان. دەگەنمەن، ناقتى ماقۇلدانعان جوق. ىقتيارحاتى بار ەتنوستىق قازاقتار تۇرعىلىقتى مەكەن- جايى بويىنشا تىركەۋگە تۇرا بەرەدى. ىقتيارحاتپەن جۇرگەن باسقا شەت ەل ازاماتتارىنا دا ۋاقىتشا تىركەۋگە تۇرۋ كەرەك ەمەس. كەرىسىنشە، ول ازاماتتار تۇراقتى تىركەۋگە تۇرعان جەرىنەن باسقا مەكەن- جايعا ۋاقىتشا تىركەلگەن جاعدايدا بۇل زاڭ بۇزۋشىلىق بولىپ ەسەپتەلەدى. وسىنداي ساۋالمەن بىزگە كەلىپ جاتقان ازاماتتار لەگى كوپ. ولارعا بارىنشا ءتۇسىندىرۋ جۇمىستارى جۇرگىزىلىپ جاتىر. ۋاقىتشا تىركەۋ بويىنشا ول ازاماتتارعا ەشقانداي الاڭداۋدىڭ قاجەتى جوق»، - دەدى ول.

كوشى- قون پوليتسياسى قىزمەتكەرىنىڭ بۇل جاۋابىنان كوپشىلىكتى الاڭداتقان ماسەلەنىڭ ارا- جىگى اشىلعانداي بولعانى راس.

ويتكەنى، جۇپار دۇيسەنبەك تىلگە تيەك ەتكەندەي، عالامتور بەتتەرى مەن جاۋاپتى مەكەمەلەردىڭ سايتتارىنان بۇل ساۋالعا قاتىستى ناقتى اقپارات تابا المادىق.

تاريحي اتامەكەنىنە كوش تۇزەپ جاتقان قانداستارىمىزدىڭ باسىم بولىگى وزبەكستان مەن قىتايدان قونىس اۋدارعاندار. مەملەكەت تاراپىنان ولارعا بارىنشا قولداۋ كورسەتىلۋدە. ەلباسىمىز «الەمدە ءوز قانداستارىن اتاجۇرتقا جيناپ، مەملەكەتتىك تۇرعىدان ارنايى باعدارلامالار قابىلداعان، كەلگەندەردىڭ جاڭا ورتادا جاتسىنباي، بىردەن ءسىڭىپ، جايلى عۇمىر كەشىپ كەتۋىنە بارلىق جاعدايلارىن جاساپ جاتقان دۇنيە جۇزىندەگى ءۇش ەلدىڭ ءبىرى - قازاقستان»، دەپ بەكەر ايتپاسا كەرەك. قانداستارىمىزدىڭ الەۋمەتتىك جاعدايىنىڭ جاقسارىپ، ءال- اۋقاتىنىڭ ارتۋى ەلىمىز ءۇشىن زور ابىروي. وسى رەتتە ولارعا قۇقىقتىق تۇرعىدان كومەك كورسەتۋ بارلىق قوعام مۇشەلەرىنىڭ مىندەتى بولۋعا ءتيىس.

ارمان وكتيابر،

جۋرناليست

الماتى

  egemen.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى