اعزانى كوكتەم مەزگىلىنە قالاي دايىندايدى
«قىستان امان شىقتىق، كوكتەم كەلدى» دەپ شاتتانعانىمىزبەن اعزامىزدا ورىن الاتىن كەي وزگەرىستەر قۋانىشىمىزدى سۋ سەپكەندەي باساتىنى بار.
ءار كوكتەم سايىن بۇلاي قايتالانۋدىڭ سىرى ءبىزدىڭ يممۋندى جۇيەمىز جۇقارىپ، اعزاداعى دارۋمەن قورىنىڭ ازايۋىندا، دەپ جازادى anabol.kz.
قىستىڭ سۋىعىندا ۇيدە وتىرىپ، كەڭسەدەن كوپ شىقپاي، از قيمىلدايمىز. كوكتەم باستالىسىمەن بىردەن پايدا بولاتىن قيمىلداردىڭ سالدارىنان السىزدىككە ۇرىنامىز. قار ەرىپ، قارا جەر بۋسانىپ جاتقانداعى اۋا رايىنىڭ وزگەرىسى قان قىسىمىنىڭ تومەندەۋى مەن باس اۋرۋلارىنا الىپ كەلەتىنى تاعى بار.
كوكتەمگى شارشاۋ اۆيتامينوزعا دا بايلانىستى بولادى. بۇل ماۋسىمداعى جەمىستەر مەن كوكونىستەر قۇرامىنداعى بارلىق پايدالى دارۋمەندەر مەن قوسىلىستار بۇزىلادى، ءتىپتى زياندىلارى دا پايدا بولادى. سوندىقتان قىستان قالعان الما مەن ءسابىز اۆيتامينوزبەن كۇرەسە المايدى.
بۇل ورايدا ايتارىمىز دارىگەرمەن كەڭەسە وتىرىپ ارنايى دارۋمەندەر قابىلداعان پايدالىراق. جانە قاي مەزگىلدە دە قۇنارىن جوعالپايتىن ءداندى- داقىلداردان باس تارتپاي دۇرىس تاماقتانعان ءجون. دۇرىس تاماقتانۋ دەمەكشى قىز- كەلىنشەكتەر اراسىندا بۇل مەزگىلدە دەنە سىمباتىمەن كۇرەسۋ بەلسەندىلىگى ارتاتىنى جاسىرىن ەمەس.
ارۋلارىمىز ديەتا دەيدى دە دارۋمەنسىز اعزانىڭ دارمەنسىزدىگىنە قاراماي وزدەرىن تاماقتان شەكتەپ تاستايدى. شىن مانىندە «ديەتا» ءسوزىنىڭ «دۇرىس ءارى پايدالى تاماقتانۋ» دەگەن ماعىنانى بىلدىرەتىنىن ەلەپ ەسكەرمەيدى دە. ءبىزدىڭ ايتارىمىز الدىمەن ساۋلىعىڭىزعا كوڭىل ءبولىڭىز. السىزدىك بايقالىپ، كورۋ قابىلەتىڭىز ناشارلاسا ا دارۋمەنىنە، جۇيكەڭىز جۇقارىپ، شاشىڭىز ءتۇسىپ، تىرناعىڭىز سىنا باستاسا ۆ دارۋمەنىنە، اعزاداعى زات الماسۋ پروتسەسىندە وزگەرىس بايقالىپ، بۋىندارىڭىز سىر بەرىپ جاتسا س دارۋمەنىنە باي تاعامداردى داستارحان مازىرىنەن تۇسىرمەڭىز. بۋىندار مەن بۇلشىق ەتتەرىڭىزگە دە نازار اۋدارىڭىز!
كوكتەمدە بۋىندار سىرقىراپ، ەسكى جارالار مەن سوزىلمالى اۋرۋلار سىر بەرە باستايدى. قانشا ساقتانساڭىز دا، سۋىق جەل سىزگە جەتپەي قويمايدى. ءدارىحانالارعا باس سۇعىپ، ارنايى مايلار مەن جىلىتاتىن كرەمدەردى جانە اۋرۋدى باساتىن گەلدەردى الىپ قويۋعا كەڭەس بەرەمىز. جۋاننىڭ جىڭىشكەرىپ، جىڭىشكەنىڭ ۇزىلەر تۇسىندا جۇيكەنىڭ پسيحولوگيالىق السىرەۋى دە سىر بەرەتىنى بار.
مۇندايدا جۇيكەنى تىنىشتاندىرۋ ءۇشىن دەنە جاتتىعۋلارى تاپتىرماس ەم. كۇندەلىكتى 10-15 مينۋت ۋاقىتىىڭىزدى جاتتىعۋعا ارناساڭىز قان اينالىمى جانە بۇلشىق ەتتەردىڭ ميكرو جانە ماكرو ەلەمەنتتەرىمەن قورەكتەنۋى كۇشەيە تۇسەدى. ىشكى سىلكىنىس (ەندوكريننايا جەلەزا) بەزدەرىنىڭ جاقسى جۇمىس ىستەۋىنە مۇمكىنشىلىك تۋادى. اعزاعا جاعىمدى ەموتسيالىق قۇبىلىستاردىڭ بولۋىنا اسەر ەتەدى. فيزيكالىق بەلسەندىلىكتى ارتتىرۋعا نيەتتىلەرگە كوپتەگەن ءار ءتۇرلى دەنە شىنىقتىرۋ جاتتىعۋلارىنىڭ مول جيىنتىعىنىڭ اراسىنداعى ەڭ ءبىرىنشى ورىنعا شىعاراتىندارى: ساۋىقتىرۋ ءجۇرىس، جۇرىسپەن الماستىرىپ تۇراتىن جۇگىرۋ، اەروبيكا، ءجۇزۋ، گيمناستيكا جانە تىنىس الۋ جاتتىعۋلارى.
