ساپاربايەۆ شاڭعى تەبۋگە ارنالعان دەمالىس ورنىن سىنعا الدى - فوتو

بەردىبەك ساپاربايەۆ ادام ۇيالاتىنداي دەمالىس بازاسىن سپورت مەكتەبىنە الۋدى تاپسىردى، دەپ حابارلايدى قازاقپارات ءتىلشىسى. اقتوبەدە قىسقى سپورت تۇرلەرى كەنجەلەپ قالعان. وڭىردەگى جالعىز سپورت مەكتەبىنىڭ بالالارى قىستا شاڭعى، كونكي تەبۋگە ماشىقتانعانىمەن، ولاردىڭ جىل بويى دايىندالۋىنا مۇمكىندىك جوق.

ال شاڭعى تەبۋگە ىڭعايلى دەمالىس بازاسىنىڭ جاعدايى كوڭىل كونشىتەرلىك ەمەس. «جان- جاعىن قورشاپ، رەتكە كەلتىرۋدى تاپسىردىق. ءبىراق ەش ناتيجە جوق. وتكەن جىلى وبلىستىق، قالالىق دەنە شىنىقتىرۋ جانە سپورت باسقارماسىنا تاپسىرما بەرىپ، جوندەۋ جۇرگىزۋ قاجەت ەكەنىن ايتتىم. مىناۋ ۇيات، ماسقارا. دەمالىس بازاسى قۇلايىن دەپ تۇر. ونى جوندەۋگە كاسىپكەردىڭ قارجىسى جوق. حوككەي الاڭىنداعى قاقپالار قيراپ، قۇلاپ جاتىر، قورشالماعان. بالالار سپورتپەن شۇعىلدانعىسى كەلەدى، ال دەمالىس بازاسى ولارعا قاجەتتى جاعداي جاساي المايدى»، - دەدى وبلىس اكىمى بەردىبەك ساپاربايەۆ.

الداعى ۋاقىتتا دەمالىس بازاسى قىسقى سپورت تۇرلەرى بويىنشا وبلىستىق بالالار جانە جاسوسىرىمدەر سپورت مەكتەبىنە بەرىلۋى مۇمكىن. ءوڭىر باسشىسى ب. ساپاربايەۆ 50 ميلليون تەڭگەگە دەيىن قارجى ءبولىپ، جوندەۋ جۇرگىزۋگە تاپسىرما بەردى.

ايتا كەتەيىك، 2003 -جىلى تۋعان بالالار اراسىندا ەل بىرىنشىلىگى ءوتىپ، اقتوبەلىك باتىرجان دەمەۋجان شاڭعى جارىسىنان ەكى دۇركىن جەڭىمپاز اتاندى. بۇل قىسقى سپورت تۇرلەرى بويىنشا اقتوبە تاريحىنداعى العاشقى جەڭىس.

اۆتور: التىناي ساعىندىقوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى