اعايىندى رىسقاليەۆتەر ۇلتتىق تاربيە جوقتىعىنىڭ جاعىمسىز مىسالىنا اينالىپ وتىر - باشماكوۆ

 لەۆ گۋميليەۆ اتىنداعى ەۋرازيا ۇلتتىق ۋنيۆەرسيتەتى قازاقستان حالقى اسسامبلەياسى كافەدراسىنىڭ مەڭگەرۋشىسى اناتوليي باشماكوۆ ءوز بايانداماسىندا اعايىندى رىسقاليەۆتەردى ۇلتتىق تاربيەنىڭ جوقتىعىنىڭ جاعىمسىز مىسالى رەتىندە كەلتىردى، دەپ حابارلايدى قازاقپارات ءتىلشىسى.

پرەزيدەنتتىڭ حالىققا ارناعان جولداۋىنداعى ادام كاپيتالىن دامىتۋ ماسەلەسى جايىندا ايتا كەلە، عالىم باشماكوۆ حالىقتىڭ رۋحاني دۇنيەتانىمىن دامىتۋ، ۇلتتىق تاربيەنى كۇشەيتۋ پروبلەماسىنا باسا نازار اۋداردى.

«بىزگە ينتەلليگەنتتەردى تاربيەلەۋ كەرەك. ونداي تاربيەنى جوعارى وقۋ ورنىنان تاپپايسىڭ. سەبەبى ونداي قاسيەت جۇرەك ارقىلى، وتانعا دەگەن سۇيىسپەنشىلىك سەزىمىمەن بىرگە كەلەدى. تۋعان شاڭىراقتا انا سۇتىمەن بىرگە داريدى. ادامنىڭ جوعارى ءبىلىمى بولۋى مۇمكىن. الايدا ءوزى الاياق، جەكسۇرىن بولۋى دا ىقتيمال. ەندى قاراڭىزشى، كەزىندە قازاق جەرىندە تۇرمە اتىمەن بولماعان عوي. ادامدى اتۋ، دارعا اسۋ دەگەن تۇسىنىكتەر دە بولمادى. تۋعان جەردەن اجىراپ، ءوز رۋىڭنان الشاق قالساڭ، ودان ارتىق جازا بولمايتىن ەدى. مەن ىلعي اناۋ ەكى اعايىندى قانداي سەزىمدە بولدى دەپ ويلايمىن. بىرەۋى ءماجىلىس دەپۋتاتى، ەكىنشىسى اتىراۋ وبلىسىنىڭ اكىمى بولىپ ءجۇرىپ، حالىقتىڭ اقشاسىنا اۋىز سالىپ، شەتەلگە قاشىپ كەتتى. ءسويتىپ، ەكەۋى ۇلى بريتانيادا تايراڭداپ جۇرگەندە، تۋعان- تۋىستارى ۇياتقا قالدى. ەكى ۇلىنىڭ بەزىپ كەتكەنىنە شىداي الماعان اكەسى ءۇش ايدان كەيىن قايتىس بولدى. سوندا تۋعان ۇلدارى كەلىپ، ءبىر ۋىس توپىراق سالا المادى. ۇلتتىق تاربيەنىڭ جوقتىعىنىڭ ەڭ سوراقى مىسالى وسى بولسا كەرەك»، - دەدى ەكس- دەپۋتات باشماكوۆ.

ايتا كەتەيىك، بۇگىنگى شارا «قوعامدىق كەلىسىم مەن جالپى ۇلتتىق بىرلىك سالاسىنداعى مەملەكەتتىك ساياسات: دامۋدىڭ جاڭا كەزەڭىنىڭ مىندەتتەرى» تاقىرىبىنداعى رەسپۋبليكالىق سەمينار- ترەنينگ اياسىندا ۇيىمداستىرىلدى.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى