ەردوس احماديەۆ: سوچيدە تۋ الىپ شىققاندا قاتتى قوبالجىعانمىن، بۇل جولى وزگەشە سەنىمدە بولدىم

الايدا جۇلدەگە قول جەتكىزە المادى. ءبىز جارىستان كەيىن احماديەۆپەن ارنايى جولىعىپ، شاعىن سۇحبات العان ەدىك.

- ازيادا ويىندارى باستالعالى ءبىرقانشا كۇن ءوتتى. ءبىزدى قاشان جۇلدە الىپ قۋانتاسىز؟

- ول كۇندەر دە الىس ەمەس دەپ ويلايمىن. مەن الماسامدا قاسىمداعى بىرگە جۇرگەن ارىپتەسىم رينات مۋحين قازاق قورجىنىنا العاشقى التىندى الىپ بەردى. نەگىزى ءبىز ءبىر- بىرىمىزگە جارىس بارىسىندا قاتتى كومەكتەسەمىز. اسىرەسە، كوماندالىق جارىستا ءبىرىمىز ەكىنشىمىزدى الدىعا شىعارۋعا قولايلى مۇمكىندىكتەردى قاراستىرامىز. شورت- ترەكتە الدىڭدا ءبىر كارىس نە جاپون سپورتشىسى كەلە جاتسا، ول ادەيى جىعىلىپ، سەنىڭ جولىڭدى بوگەيدى دە، ارتىنداعى كوماندالاستارىن الدىعا شىعارۋعا جول جاسايدى. ءبىز ولاي قاساقانا جىعىلماساق تا، جانىمىزداعى ارىپتەستەرىمىزدى الدىعا وزدىرۋعا كومەكتەسەتىن كەزدەرىمىز بولادى.

- الدا ءالى 30 شاقىرىمدىق جارىستار بار. مۇمكىن مەدال ءۇشىن كۇرەسەتىن بولارسىز؟

- ارينە، كوماندالىق جارىستا التىن الامىز دەگەن ويدامىز. سەبەبى، جەكەلەي سىنداردا ەكى مىقتى جاپوندىق بار. ولار بىزگە جول بەرەر ەمەس. ەتاپەتالىق جارىستا ءبىزدىڭ كوماندامىز مىقتى شىعاتىنىنا سەنىمدىمىن. ءبىراق، ءبىزدىڭ ءار كۇنىمىز جوسپارلى تۇردە بەكىتىلىپ قويعان. ءبىز 26 -كۇنى ۇشاققا وتىرۋىمىز كەرەك. جوسپار سولاي. ەگەر جارىس كەستەسى مەن ۇشۋ ۋاقىتىمىز سايكەس كەلمەسە، جارىسقا قاتىسپايمىز. جابىلۋ سالتاناتىنان بۇرىن كەتەمىز.

- ساپپورودان كەتە سالىپ باسقا جارىستارعا اتتاناتىن بولدىڭىزدار عوي...

- ءيا، بارلىعىن باپكەرلەرىمىز الدىن الا جوسپارلاپ، شەشىپ قويعان. ءبىز شاكىرت بولعاسىن باپكەرلەرىمىز نە دەدى، سونى ورىنداۋىمىز كەرەك.

- سوچي وليمپياداسىندا العاش رەت قازاقستان تۋىن الىپ شىقتىڭ. مىنە، ساپپورودا دا تۋىمىزدى ساعان سەنىپ تاپسىردى. قانداي سەزىمدە بولدىڭ؟

- ارينە، ەلىڭنىڭ بايراعىن ۇستاپ، توپ باستاپ شىعۋ - ۇلكەن باقىت. شىنىمدى ايتسام، سوچيدە تۋ الىپ شىعاسىڭ دەگەندە تاڭ قالعام. قاتتى قوبالجىعانىمدا راس. ول جاڭالىق مەن ءۇشىن كۇتپەگەن جايت بولعان. ءتىپتى، العاشىندا باپكەرىم «تۋدى سەن ۇستاپ شىعۋىڭ مۇمكىن» دەدى. سول كەزدە ۇمىتكەرلەردىڭ قاتارىنا قوسىلعانىمنىڭ وزىنە قاتتى قۋانىپ ەدىم. ال بۇل جولى وزگەشە سەزىمدە بولدىم. وسىنداي مۇمكىندىك بەرىپ، ماعان سەنىم بىلدىرگەندەرى ءۇشىن ەلباسىنا، وتاندىق سپورت باسشىلارىنا العىسىم شەكسىز. ەندى، ساپپورودا ەل قورجىنىنا ءبىر مەدال سىيلاسام بولعانى.

- اڭگىمەڭىزگە راحمەت! جەڭىستى كۇندەر كوپ بولسىن...

اۆتور: كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى