ديماش قۇدايبەرگەنوۆ قىتايلىقتارعا «اناعا سالەم» اكاپەللاسىن شىرقاپ بەردى - فوتو، كەسكىن
ۆيدەو Sina Weibo الەۋمەتتىك جەلىسىنە ورنالاستىرىلعان. ديماش قۇدايبەرگەن «I'm in China» جوباسى اياسىندا ءبىرىنشى رەسمي ەلشى رەتىندە پاندالاردىڭ(مىسىق ايۋ) قورىعىندا بولدى. «بۇكىلالەمدىك جانۋارلاردى قورعاۋ ۇيىمىنىڭ لوگوتيپىنەن پاندانىڭ سۋرەتىن كورگەندە «نە سەبەپتى ءدال وسى جانۋار قىزىل كىتاپقا ەنىپ جاتقان مىڭداعان تىرشىلىك يەسىنەن ءبىرىنشى ورىندا ۇلكەن نازارعا يە؟» دەپ ويلايتىن بولارسىزدار؟! بۇل جانۋاردىڭ الەم بويىنشا 2 مىڭعا جۋىق قانا سانى قالىپتى. ءومىر سۇرۋلەرى ەرەكشە! مىنەزدەرى ادامعا ۇقساس. رەنجىپ قالادى، ەركەلەيدى!... مەن كەشە ولارمەن كەزدەستىم...»، - دەپ جازدى ءانشى ينستاگرامداعى پاراقشاسىندا.
سونداي-اق ديماش قۇدايبەرگەن قىتايدىڭ سىچۋان ولكەسى جەر جۇزىندەگى بارلىق پاندالاردىڭ وتانى بولىپ تابىلاتىنىن جازدى. «كونە چىڭدۋدىڭ تار كوشەلەرىندە حالىق مۋزىكاسى ويناپ تۇردى، مەكتەپتەردىڭ ءبىرىنىڭ بالالارى مەن مۇعالىمدەرى انشىگە ساحنالىق قويىلىم كورسەتتى. ديماش ءوز قالاۋىمەن كوشەنى ءوزىنىڭ تازا، جوعارى داۋىسىمەن جاڭعىرتتى»، - دەپ جازدى قىتايلىق ب ا ق. ديماش سىچۋان اسحاناسىنىڭ ءدامىن تاتتى، قالاعا جەكە كونسەرتىن بەرۋگە نيەتتى ەكەندىگىن جەتكىزدى.
ەسكە سالايىق، وسى كۇندەرى وتانداسىمىز قىتايدىڭ Hunan.TV تەلەارناسىنداعى «Singer» ءان بايقاۋىنا قاتىسىپ جاتىر. بۇگىنگى ۋاقىتقا دەيىن بايقاۋدىڭ 6 كەزەڭى ءوتتى، بارلىعى 10 كەزەڭنەن تۇرادى. ديماش ولاردىڭ بارلىعىندا دا قاجەتتى داۋىستار جيناپ، كەلەسى كەزەڭگە ءوتىپ وتىردى.
ەرەكشە تالانتىمەن قىتايلىق كورەرمەندەردى تامساندىرعان ول، بىرنەشە كەزەڭدە العاشقى ورىننان كورىندى. ديماش قۇدايبەرگەن قىتايلىق ساحنادا فرانسۋز تىلىندەگى «SOS d'un terrien en détresse» كومپوزيتسياسىن، 28 -قاڭتار كۇنى وتكەن ەكىنشى كەزەڭدە رەسەيلىك ۆيتاستىڭ «وپەرا №2» ءانىن، Queen توبىنىڭ «Show must go on» ءانىن، قىتاي تىلىندە «كۇزگى مۇڭ»، پيتەر دجين ەرناندەستىڭ (برۋنو مارس) رەپەرتۋارىنان «Uptown Funk» اندەرىن جانە سوڭعى وتكەن 6-كەزەڭنىڭ تۇسىرىلىمىندە الەمگە تانىمال ءانشى لارا فابياننىڭ رەپەرتۋارىنان «Adagio» ءانىن ورىندادى. بۇل كەزەڭ قىتاي تەلەارنالارىنىڭ ەفيرىندە 25 -اقپان كۇنى كورسەتىلەدى. قىتايلىق الەۋمەتتىك جەلىلەردىڭ جازۋىنشا، ديماش اتالمىش سوڭعى كەزەڭدە ءبىرىنشى ورىنعا قول جەتكىزدى.
