جەتىمدەر ءۇيىنىڭ بۇرىنعى تاربيەلەنۋشىسى ەكى جىلدان بەرى اقتوبە ۆوكزالىن پانالاپ ءجۇر - فوتو

25 جاستاعى جىگىتتىڭ جەكە كۋالىگى جوق. سول سەبەپتى تۇراقتى جۇمىس ىستەي الماي، اركىمنىڭ جۇك دورباسىن تاسىپ، جان ساقتاپ وتىر، دەپ حابارلايدى قازاقپارات ءتىلشىسى. سەرگەي كاندىبا اقتوبە وبلىسى، العا اۋدانىنداعى تامدى بالالار ۇيىندە تاربيەلەنگەن. اتا-اناسى ءتىرى، ءبىراق بالاسىنان باس تارتقان. سەرگەي بالالار ءۇيىن 21 جاسىنا دەيىن پانالاپ، كەيىن اكەسى مەن اناسىن تاۋىپ الادى.

جەكە كۋالىك دايىنداۋ ءۇشىن ولاردىڭ قۇجاتتارىن جيناپ، بارلىق كوشىرمەنى اۋداندىق ىشكى ىستەر بولىمىنە تاپسىرعان. ءبىراق ارادا ءۇش جىل وتكەنىمەن، قۇجات ءالى دايىن ەمەس. ال سەرگەي كاندىبا جازدا ەگىن شارۋاشىلىعىنداعى جالدامالى جۇمىستاردى ىستەپ، قىستا تەمىرجول ۆوكزالىن پانالاۋدى ادەتكە اينالدىرعان. ونى ءبارى تانيدى، قوعامدىق ءتارتىپتى بۇزباعان سوڭ پوليتسيا جازالاعان ەمەس.

«مەن ەركىن جاتىپ، ۇيىقتاعان ەمەسپىن. ۆوكزال ىشىندە 10-15 مينۋت كوز ءىلىپ، كەيىن سول جەردەگى تىرلىكتى باقىلاپ وتىرامىن. پويىزداردىڭ ءجۇرۋ كەستەسىن جاتقا بىلەمىن. ەكى جىلدىق ءومىرىم وسىلاي ءوتىپ جاتىر. پوليتسيا قىزمەتكەرلەرى العاشقى كەزدە سۇرادى، باقىلادى. ءتارتىپ بۇزباعان سوڭ ولار ماعان ەسكەرتۋ جاسامايدى»، - دەيدى سەرگەي كاندىبا. بالالار ءۇيىنىڭ تاربيەلەنۋشىسى جەكە كۋالىگىن جاساتىپ، جۇمىسقا ورنالاسۋدى ارماندايدى. «سول كەزدە تۇراقتى جۇمىسقا ورنالاسىپ، پاتەر جالداپ، وتباسى قۇرۋعا مۇمكىندىك بولار ەدى. جازدا كوكونىس پەن جەمىس- جيدەك ەگەتىن شارۋاشىلىقتا جالدامالى جۇمىسشى بولىپ جۇمىس ىستەدىم. ماعان ايىنا 30 مىڭ تەڭگە اقشا بەردى. بۇل تاماعىما جەتەتىن ەدى. قازىر ۆوكزال ىشىندە جولاۋشىلاردىڭ جۇك دورباسىن كوتەرىپ، سول قىزمەتىمە از اقشا الامىن. كۇنىنە 200-500 تەڭگە تابامىن. بۇل تاماعىما جەتەدى»، - دەيدى س. كاندىبا.

اۆتور: التىناي ساعىندىقوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى