اكادەميك شارمانوۆ حالىققا «ءتاڭىر ۇسىنعان سۋسىندى» ىشۋگە كەڭەس بەردى

بۇل پىكىردى «بايتاق-بولاشاق» ەكولوگيالىق اليانسىنىڭ جانىنان قۇرىلعان كلۋبتىڭ وتىرىسىندا «تاعام تانۋ» اكادەمياسىنىڭ پرەزيدەنتى تورەگەلدى شارمانوۆ ايتتى، دەپ حابارلايدى قازاقپارات.

«جۋىردا رەسەي عالىمدارى نارىقتاعى سارى ماي ونىمدەرىنىڭ 90 پايىزى سيىر سۇتىنەن جاسالماعانىن مالىمدەدى. بۇل ەندى وتە قاۋىپتى مالىمدەمە. زاۋىتتا جاسالعان سارى مايدىڭ قۇرامىندا پالما مايى، توكسيندىك زاتتار بار. سوندىقتان، زاۋىتتا جاسالعان سارى مايدى ساتىپ الۋ ارقىلى ءوز ومىرىڭىزگە قاۋىپ توندىرەتىنىڭىزدى بىلگەن دۇرىس»، - دەدى ت. شارمانوۆ.

اكادەميك ءوز بايانداماسىندا ەنەرگەتيكالىق سۋسىنداردىڭ دا زيان ەكەنىن اتاپ ءوتتى.

«سانتەحنيكتەر مەن اۆتوكولىك جوندەۋشى ماماندار تەحنيكالىق قۇرالداردى جۋۋ ءۇشىن پايدالاناتىن زياندى ءونىمدى حالىقتىڭ قالاي تۇتىناتىندارى تۇسىنىكسىز. قۇرامىنداعى قانتتىڭ مولشەرى شامادان تىس، ءتۇرلى بوياۋلار، حيميكياتتارعا تولى گازبەن جاسالاتىن ەنەرگەتيكالىق سۋسىنداردى اقسۇيەك ادامدار ىشپەيدى»، - دەيدى ول.

ونىڭ ايتۋىنشا، ەنەرگەتيكالىق سۋسىنداردى بيە سۇتىمەن الماستىرعان دۇرىس.

«مەن كوپشىلىككە بيە ءسۇتىن ءىشۋدى ۇسىنامىن. بيە ءسۇتى ادام اعزاسىنىڭ الەۋەتىن جوعارىلاتادى. ونىڭ قۇرامىندا اعزاعا زياندى ونىمدەر جوق. بيە ءسۇتىن «ءتاڭىر ۇسىنعان سۋسىن» دەپ ايتار ەدىم»، - دەدى اكادەميك.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى