وتاندىق ءونىم «ارلان» بروندى ماشيناسى جاۋىنگەرلىك تۇرعىدا سىنالدى - فوتو
«شىعىس» پوليگونىندا قازاقستاندىق بروندى كولىكتىڭ اسكەري مۇمكىندىكتەرى قىسقى اۋا رايى جاعدايىندا تەكسەرىلدى. تەست- درايۆ اياسىندا قارلى بۇرىلىستاردا اسكەري قىزمەتشىلەر بروندى ماشينامەن مارش جاساپ، «ارلانمەن» جابدىقتالعان «سارپ» اسكەري مودۋلىن ءىس- قيمىل بارىسىندا سىناپ كوردى. سونداي- اق كالاشنيكوۆ اۆتوماتىنان، دراگۋنوۆ مىلتىعىنان جانە وسۆ-96 ءىرى كاليبرلى مىلتىقتان اتىپ بروندى كولىكتىڭ بەرىكتىگىن تەكسەردى. ناتيجەسىندە وتاندىق ءونىم جەكە قۇرامنىڭ قاۋىپسىزدىگىن قامتاماسىز ەتەتىن جوعارى ءوتىمدى، مانيەۆرلى جانە قورعانىسى مىقتى ەكەنىن كورسەتتى.
«ارلان» - بۇل ميناعا قارسى قورعانىسى كۇشەيتىلگەن كوپ ماقساتتى بروندى دوڭگەلەكتى ماشينا. بۇل تۇردەگى ماشينالار سىنىقتار قارسى تۇرا الاتىن جانە جارىلعىش زاتتىڭ قۋاتىن سەيىلتۋ مۇمكىندىگى بار ۇلكەن ساڭىلاۋعا يە. سالماعى 16 توننالىق بروندى كولىك جىلدامدىعىن ساعاتىنا 100 شاقىرىمنان اسىرا الادى جانە
-50⁰С تان +50⁰С قا دەيىنگى اۋا رايىندا پايدالانۋ ءۇشىن تولىق بەيىمدەلگەن.
«ارلاننىڭ» جان- جاقتى ەلەكتروندى- وپتيكالىق جۇيەسىنىڭ اسكەري مودۋلى جىلۋ بەرەتىن كامەراسىمەن، كۇندىزگى كورۋ كامەراسىمەن، لازەرلىك الىستى ولشەۋشى قۇرالمەن كەز- كەلگەن كليماتتىق جاعدايدا تۇنگى جانە كۇندىزگى ۋاقىتتا باقىلاۋعا، بارلاۋعا جانە كوزدەپ اتۋعا مۇمكىندىك بەرەدى.
قازاقستان قارۋلى كۇشتەرىنىڭ تالاپتارى مەن ۇسىنىستارىن ەسكەرە وتىرىپ «ارلان» بروندى ماشيناسى «قازاقستان پاراماۋنت ينجينيرينگ» ج ش س قۇراستىرۋشى بيۋروسىنىڭ قازاقستاندىق ماماندارىنىڭ كومەگىمەن جاسالعان.
2016 -جىلى بروندى كولىكتەردىڭ ءبىرىنشى لەگى ەلىمىزدىڭ قارۋلى كۇشتەرىنە بەرىلدى، وسىعان ۇقساس تەحنيكا بۇگىندە ارميادا جوق. اتالعان ماشينانىڭ تيىمدىلىگىن سىناۋ ءۇشىن جەكە قۇرام وقىتىلدى.
