وڭتۇستىك قازاقستان جىگىتتەرى شەتەلدىك قىزدارمەن كوبىرەك نەكەلەسەدى - فوتو
ق ر ۇلتتىق ەكونوميكا مينيسترلىگىنىڭ «قازاقپارات» ح ا ا- نىڭ رەسمي ساۋالىنا بەرگەن جاۋابىندا، 2016-جىلدىڭ قاڭتار مەن قاراشا ايلارىندا قازاقستاندىق 2154 قىز بەن 3112 ەر ادام شەتەلدىك ازاماتتارمەن نەكەگە وتىرعان، دەپ حابارلايدى قازاقپارات ءتىلشىسى.
وزگە ەلدىڭ ازاماتشالارىمەن كوبىنە و ق و- لىقتار نەكەلەسكەن. اتالعان ايماقتىڭ 658 ازاماتى وزگە ەلدىڭ قىزىن جار ەتكەن. مىسالى، سونداي وتباسىنىڭ ءبىرى تۇركىستاندىق كۇلسانوۆتار جانۇياسى. تاجىكستاننان كەلگەن مۋنيسا ق. ياساۋي اتىنداعى قازاق-تۇرىك ۋنيۆەرسيتەتىنە 2014-جىلى وقۋعا تۇسەدى. ونىڭ جارى قايرات سول كەزدە ءوز بيزنەسىن ەندى باستاعان كەزى بولاتىن. ول ستۋدەنت قىزدى كورىپ، ونىمەن تانىسادى.
«تانىسقاننان باستاپ ءبىز ايىرىلماۋعا بەكىندىك. 2 جىلدان كەيىن تويىمىزدى وتكىزدىك. توي ەكى قالادا دۋشانبە جانە تۇركىستاندا بولدى. قازاق، تاجىكتىڭ داستۇرىندە، ۇلتتىق تاعامدارىندا ءبىر ۇقساستىقتار بار دەر ەدىم. تويىمىز جاقسى ءوتىپ، بارلىعى ريزا بولدى»، - دەدى مۋنيسا.
قازىر جاستار تۇركىستان قالاسىندا تۇرادى. مۋنيسا وقۋىن جالعاستىرىپ جاتسا، قايرات ءوز ىسىمەن اينالىسىپ كەلەدى. جاس وتباسى قازاق-تاجىك ءداستۇرىن بىردەي ۇستاپ، بولاشاقتا 5 بالالى بولۋدى ارماندايدى.
«مەن تاماق ىستەگەندى ۇناتامىن، سوندىقتان ۇيدە ءتۇرلى تاعامدار ازىرلەيمىز. مەن باۋىرساق ءپىسىرىپ، ەت اسامىن، تاجىك پالاۋىن دا باسامىن. جالپى، اسحانا كەز كەلگەن شىعىس ايەلىنىڭ ومىردەگى باستى دۇنيەسى دەپ ەسەپتەيمىن. وقۋىمدى اياقتاعان سوڭ ءومىرىمدى وتباسىما، بالالارىما ارناعىم كەلەدى. قازاق ەلى مەن تاجىك حالقىنىڭ ماقتان تۇتار ۇل-قىزدارىن تاربيەلەگىم كەلەدى»، - دەيدى مۋنيسا.
سونداي-اق، الماتى مەن استانانىڭ قىزدارى شەتەلدىكتەرگە كوبىرەك تۇرمىسقا شىعادى. وتكەن جىلى الماتىدان - 510، استانادان 260 قىز شەتەلدىكپەن نەكەگە تۇرعان.
مىسالى، الماتىلىق جاننا بايزراحمانوۆا-بريەدە الەۋمەتتىك جەلى ارقىلى 2014-جىلى مارتين بريەديس دەگەن لاتىشپەن وتاسىپ، قازىر لوندوندا تۇرادى.
اۆتور: الماس مۇقاش ۇلى
