ءوزىنىڭ باسىنا وق اتقان ۇلتتىق قاۋىپسىزدىك كوميتەتىنىڭ قىزمەتكەرى ەسىن جيىپ كەلەدى
اقپاننىڭ 8- كۇنى جەدەل مەديتسينالىق جاردەم اۋرۋحاناسىنا باسىنا جانە بەتىنە تيگەن وق جاراقاتىمەن ۇ ق ك اسكەري پوليتسياسىنىڭ قىزمەتكەرى جەتكىزىلدى. دارىگەرلەردىڭ ايتۋىنشا، وق ماڭداي سۇيەگىنەن شىققان. ميعا زاقىم كەلگەن. وپەراتسيا 7 ساعاتقا سوزىلدى، ەكى حيرۋرگيالىق بريگادا جۇمىس ىستەدى. ەمدەۋ جۇمىستارى جونىندەگى باس دارىگەردىڭ ورىنباسارى مارات جانقۇلوۆ وسى ۋاقىتتا جانساقتاۋ بولىمىندە جاتقان اسكەري پوليتسيا كاپيتانىنىڭ دەنساۋلىق جاعدايى تۋرالى ايتىپ بەردى.
«قازىر ونىڭ جاعدايى اۋىر، ءبىراق، قان قىسىمى ءبىر قالىپتا. نە دەگەنمەن، وتە اۋىر جاراقات. جاعدايى جاقسارىپ كەلە جاتقاندىعى تۋرالى ايتۋ ءالى ەرتە. سەبەبى ەمدىك پروتسەدۋرالار ارقاسىنداعى الدامشى جاقسارۋلار بولۋى مۇمكىن. ناقتى ايتۋ ءۇشىن كەم دەگەندە تاعى 10 كۇن كەرەك. قازىر ونىڭ جاعدايى اۋىر، ءبىراق بىرتە-بىرتە ەسىن جيناپ كەلەدى. سۇراقتار مەن دارىگەردىڭ نۇسقاۋلىقتارىنا باس يزەپ جاۋاپ بەرەدى»، - دەدى ول. الدىن الا مالىمەت بويىنشا، 32 جاستاعى اسكەري پوليتسيا كاپيتانى 2030 اسكەري بولىمىندە اتۋ جاتتىعۋلارىنا جوسپارلى دايىندىق كەزىندە پيستولەتتەن ءوزىنىڭ باسىنا وق اتقان.
