مادەنيەت مينيسترلىگى ديماش جايىندا: ول قىتايعا كەزدەيسوق تۇسە قالعان جوق
الەۋمەتتىك جەلىدە قازاقستاندا مادەنيەت جانە سپورت ونەرپازدارىنا شەتەلدە تانىمالدىلىققا قول جەتكىزگەننەن كەيىن عانا مەملەكەتتىك دەڭگەيدە كوڭىل بولىنە باستايتىندىعى تۋرالى كوپ ايتىلۋدا. بۇل ۋاجگە قاتىستى ق ر مادەنيەت جانە سپورت ۆيتسە-ءمينيسترى اقتوتى رايىمقۇلوۆا جاۋاپ بەرۋگە تىرىستى.
«مەن بۇمەن كەلىسپەيمىن، سەبەبى ديماش بىرنەشە مارتە قازاقستاندىق بايقاۋلاردا دا جەڭىمپاز اتانىپ ءجۇردى. ول ۇكىمەتتىك كونسەرتتەردىڭ بارلىعىنا دا قاتىسىپ كەلدى. بىزگە ءتىپتى «باسقالارى قايدا، ءبىز ولاردى شاقىرىپ ەدىك قوي؟!» دەپ وزگە انشىلەردىڭ دە شاقىرىلۋىن سۇراعان كەزدەر بولدى. ءبىز ديماشتى ءار كەزدە دە جىلجىتىپ، حالىققا كورسەتۋگە تىرىستىق. ول ءداستۇرلى ەسترادانىڭ ءسىڭىپ قالعان قالىبىنان وزگەشە ءانشى»، - دەدى ول ۇكىمەتتە وتكەن باسپا ءسوز ءماسليحاتىندا.
ونىڭ اتاپ وتكەنىندەي، ديماش قۇدايبەرگەن قازاق ۇلتتىق ونەر ۋنيۆەرسيتەتىندە ەڭ ۇزدىك ۇستازداردىڭ قول استىندا تاربيەلەنىپ جاتىر. ونەر ۋنيۆەرسيتەتىندە دە، مينيسترلىكتە دە، كاسىپقوي انشىلەر دە ديماشتى ءاردايىم قولداپ وتىرۋعا تىرىستى. «سولاردىڭ اقىلدارىمەن ول «سلاۆيان بازارى» سىندى حالىقارالىق بايقاۋلارعا قاتىسىپ، ول جەردەن جەڭىمپاز اتاندى. وزىنە ءتان ەڭبەكقورلىعى مەن تالانتى ونى ۇلكەن جەتىستىكتەرگە جەتەلەي بەرمەك»، - دەپ سانايدى ۆيتسە- مينيستر.
«ول قىتايعا كەزدەيسوق بارا قالعان جوق. قازاق ۇلتتىق ونەر ۋنيۆەرسيتەتى، مينيسترلىك ونى بۇل بايقاۋلارعا قارجىلىق جانە شىعارماشىلىق تۇرعىدا دايىندادى. سوندىقتان قازاقستان برەندىن جىلجىتۋدا ءبىز تىس قالمايمىز. بۇل سپورتشى، مادەنيەت، ونەر، تەاتر، مۋزىكا ادامى بولسىن - ءبارىبىر. باستىسى، ءبىز تالانتتى ادامدارىمىزدى قولداۋعا ءازىرمىز»، - دەپ ءتۇيدى ويىن اقتوتى رايىمقۇلوۆا.
اۆتور: جاسۇلان جولدىبايەۆ
