ديماش قىتاي ەلىنە قازاق ۇلتى مەن ءتىلىن تانىتتى - قىتاي قازاعى
ول قاراپايىم جانە قازاقى مىنەزگە باي ءانشى. قىتاي ەلى ديماش ارقىلى قازاقستاندى تاني باستادى. بۇل تۋرالى قىتايدىڭ ءۇرىمجى قالاسىندا تۇراتىن قانداسىمىز شۋاق ءتۇرسىنالى قىزى ايتتى، دەپ حابارلايدى قازاقپارات ءتىلشىسى.
«ديماش ەرەكشە ءانشى. ول وزىنە بەرىلگەن كەز كەلگەن ءاندى ناقىشىنا كەلتىرە ورىنداپ، حالىقتىڭ سۇيىكتىسىنە اينالا ءبىلدى. الداعى ۋاقىتتا ەڭبەكتەنىپ، جاقسى ناتيجە ءۇشىن تىنباي جۇمىس ىستەسە، جەڭىسكە جەتەدى. ءبىز قۋانىشتىمىز. سەبەبى، قازىرگى ۋاقىتتا قىتاي جاستارى ديماش ارقىلى قازاقستاندى ءبىلىپ جاتىر. ۇلت پەن قازاق تىلىنە دەگەن قىزىعۋشىلىقتارى ارتتى. ءارى قانداسىمىزدىڭ قاراپايىمدىلىعى، قازاقي مىنەزى كوپتى ءتانتى ەتتى»، - دەيدى قىتاي قازاعى شۋاق ءتۇرسىنالى قىزى.
شۋاق ءتۇرسىنالى قىزى الداعى ۋاقىتتا قىتايعا كەلەتىن كەز كەلگەن ادام وسى جولدى جالعاستىرىپ، رەسمي، بەيرەسمي ساپارعا شىققان ادامداردىڭ قازاق تىلىندە سويلەسۋىن سۇرادى.
اۆتور: التىناي ساعىندىقوۆا
