الماتى ۋنيۆەرسياداسى الەم سپورتىنىڭ تاريحىنا وزىندىك ءىزىن قالدىردى - ساعىنتايەۆ

«1000 جىلدىق تاريحى بار الماتى ەكى اپتا بويى الەمنىڭ سپورتسۇيەر قاۋىمىنىڭ كوز تارتار ورتالىعىنا اينالدى. وسى ۋاقىت ىشىندە الەم قازاقستاندى، قازاقستان الەمدى جاڭا قىرىنان تانىدى. حالىقارالىق قاۋىمداستىق حالقىمىزدىڭ تامىرى تەرەڭ مادەنيەتى مەن قانىنا بىتكەن قوناقجايلىلىعىن، ۇزدىكسىز دامۋ مەن الەمدىك باسەكەلەستىكتەگى قايراتىن سەزدى. الماتى ۋنيۆەرسياداسى الەم سپورتىنىڭ تاريحىنا وزىندىك ءىزىن قالدىردى»، - دەدى قازاقستان ۇكىمەتىنىڭ باسشىسى باقىتجان ساعىنتايەۆ.

بۇگىن الماتىدا 28- بۇكىلالەمدىك قىسقى ۋنيۆەرسيادانىڭ جابىلۋى ءوتتى. وعان 57 ەلدەن 2000 مىڭعا جۋىق سپورتشى قاتىسۋدا. جابىلۋ سالتاناتى 80 ەلگە، 1 ميللياردقا جۋىق كورەرمەنگە ترانسلياتسيالانىپ وتىر. سالتاناتتى شاراعا ق ر ۇكىمەت باسشىسى باقىتجان ساعىنتايەۆ، حالىقارالىق ستۋدەنتتەر سپورتى فەدەراتسياسىنىڭ پرەزيدەنتى ولەگ ماتىسين، الماتى اكىمى باۋىرجان بايبەك جانە كەلەسى ۋنيۆەرسيادا ويىندارىن وتكىزەتىن رەسەيدىڭ كراسنويارسك قالاسىنىڭ باسشىلىعى قاتىسۋدا. ۋنيۆەرسيادانىڭ جابىلۋ ءراسىمى جەزتاڭداي ءانشى ارداق بالاجاننىڭ ءان شاشۋمەن باستالدى. كەلەسى كەزەكتە ءجاميلا سەركەبايەۆا سكريپكادا تۇركەشتىڭ «كوڭىل اشار» كۇيىمەن ارلەي ءتۇستى. ال «ۇلىتاۋ توبى» ماحامبەتتىڭ «جۇمىر قىلىش» كۇيىن توگىلتتى.

ايتا كەتەيىك، ۋنيۆەرسيادا ويىندارىنا 85 مەدال جيىنتىعى ساراپقا سالىندى. جالپى كوماندالىق ەسەپتە رەسەي كومانداسى ءبىرىنشى ورىن الدى. ولاردىڭ ەنشىسىندە 28 التىن، 27 كۇمىس جانە 15 قولا مەدال بار. ەكىنشى ورىندا قازاقستان قۇراماسى. ءبىزدىڭ سپورتشىلار بايراقتى باسەكەدە 11 التىن، 8 كۇمىس جانە 17 قولا جەڭىپ الدى. ۇزدىك ۇشتىكتى وڭتۇستىك كورەيا تۇيىندەدى. بۇل ەلدىڭ سپورتشىلارىندا 11 التىن، 5 كۇمىس جانە 5 قولا مەدال بار.

اۆتور: الماس مۇقاش ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى