ەلباسى: الماتىعا قار جاۋماعاندا، استانادان اپارار ەدىك

كەشە الماتىدا وتكەن 28- دۇنيەجۇزىلىك قىسقى ۋنيۆەرسيادا ويىندارىنىڭ اشىلۋ راسىمىندە ءسوز سويلەگەن مەملەكەت باسشىسى نۇرسۇلتان نازاربايەۆ وسىلاي قالجىڭعا باستى، دەپ حابارلايدى قازاقپارات ءتىلشىسى.

ەلباسى شەتەلدىك ساراپشىلاردىڭ الماتىنىڭ اۋا رايىنا قاتىستى قويعان سۇراعىنا دا وسىلاي جاۋاپ بەرگەن ەكەن. «جاقىندا شەتەلدىك ساراپشىلار ماعان «الماتى ەلدىڭ وڭتۇستىگىندە عوي، قار جاۋماي قالسا، نە ىستەيسىزدەر؟»، دەگەن سۇراق قويدى.

مەن ەش الاڭسىز «استانادان اكەلەمىز»، دەپ جاۋاپ بەردىم. قۇدايعا شۇكىر، قازىر الماتىدا قار قالىڭ، جارىس كۇندەرى دە قار مول بولادى دەگەن ۇمىتتەمىز»، - دەدى نۇرسۇلتان نازاربايەۆ. الماتىدا 28- دۇنيەجۇزىلىك قىسقى ۋنيۆەرسيادا ويىندارىنىڭ اشىلۋ سالتاناتى ءوتتى. شاراعا قاتىسقان ق ر پرەزيدەنتى جاستار سايىسىنا 57 ەلدەن 2 مىڭنان استام سپورتشى، مىڭداعان سپورت مامانى مەن جانكۇيەر قاتىسىپ جاتقانىن اتاپ ءوتتى. اشىلۋ راسىمىندە سپورتشىلار شەرۋىن 28-ۋنيۆەرسيادانىڭ يەسى - قازاقستان قۇراماسى اياقتادى. ەلىمىزدىڭ بايراعىن شاڭعىشى داۋلەت راحىمبايەۆ الىپ ءجۇردى. ەل نامىسىن بارلىعى 175 سپورتشى قورعايدى.

ايتا كەتەيىك، الماتىداعى ۋنيۆەرسيادا ويىندارىنىڭ اشىلۋ سالتاناتىنا حالىقارالىق ستۋدەنتتەر فەدەراتسياسىنىڭ پرەزيدەنتى ولەگ ماتىسين جانە وزگە دە ءبىرقاتار مارتەبەلى مەيماندار قاتىستى.

اۆتور: كەنجەكەي توقتامۇرات قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى