قازاقستاندىق ايەلدەردى جاتىر موينى ىسىگىنە تەگىن قارالۋعا شاقىرۋدا
ينستيتۋتتىڭ حابارلاۋىنشا، 2017 -جىلدىڭ 23-29 -قاڭتارى ارالىعىندا قازاقستاندا جاتىر موينى ىسىگى تۋرالى مالىمەتتەر بەرۋ اپتالىعى وتەدى.
«2017 -جىلى 28 -قاڭتاردا قازاقستاندا جاتىر موينى ىسىگى تۋرالى مالىمەتتەر بەرۋ اپتالىعى اياسىندا پاپ- سىناقتاردى الۋ ماقساتىندا گينەكولوگيالىق تەكسەرىستەر جۇرگىزىلەدى. سىناق نيەت تانىتقان بارلىق ازاماتشالارعا تەگىن جۇرگىزىلەدى. بۇل كۇندەرى ەلىمىزدىڭ بارلىق ونكولوگيالىق ديسپانسەرلەرىندە اشىق ەسىك كۇندەرى وتەدى، وندا قىز- كەلىنشەكتەر گينەكولوگ- ونكولوگتار تەگىن كەڭەستەر الا الادى. الماتىدا اشىق ەسىك كۇنى 28 -قاڭتاردا 9.00-دەن 14.00-گە دەيىنگى ۋاقىتتا قازاق ونكولوگيا جانە راديولوگيا عىلىمي- زەرتتەۋ ينستيتۋتىن (اباي داڭعىلىنىڭ شاعابۋتدينوۆ كوشەسىمەن قيىلىسىندا) جانە الماتى ونكولوگيالىق ديسپانسەرىندە (وتەپوۆ كوشەسىنىڭ گاگارين كوشەسىمەن قيىلىسىندا) وتەدى. استانادا ماناس كوشەسى، 17-ۇيدە ورنالاسقان قالالىق ونكولوگيالىق ورتالىقتا قابىلداۋ بولادى. وڭىرلەردەگى ونكولوگيالىق ديسپانسەرلەردىڭ مەكەنجايىن تۇرعىلىقتى جەرى بويىنشا ەمحانالاردا سۇراپ بىلە الاسىزدار»، - دەلىنگەن قازاق ونكولوگيا جانە راديولوگيا عىلىمي- زەرتتەۋ ينستيتۋتىنىڭ حابارلاماسىندا.
ونكولوگيالىق ينستيتۋتتىڭ مالىمەتتەرىنشە، 30-60 جاس ارالىعىنداعى قازاقستاندىق ايەلدەر بەس جىلدا ءبىر رەت جەرگىلىكتى ەمحانالارىندا تەگىن سكرينينگتەن وتە الادى.
«پاپ- سىناق جاتىر موينى ىسىگىن الدىن الۋدىڭ ەڭ ءتيىمدى ءادىسى. وسى ءادىستىڭ نەگىزىندە دامىعان ەلدەردە جاتىر موينى ىسىگىنەن كوز جۇماتىن ايەلدەردىڭ سانىن ەسەگە دەيىن قىسقارتا الدى»، - دەپ اتاپ وتەدى قازاق ونكولوگيا جانە راديولوگيا عىلىمي- زەرتتەۋ ينستيتۋتىنىڭ ديرەكتورى ديليارا قايداروۆا.
دەگەنمەن الەمدە ايەلدەر اراسىندا قاتەرلى ىسىكتەن كوز جۇماتىنداردىڭ جالپى سانىندا، جاتىر موينى ىسىگى كەسىرىنەن باقيلىق بولاتىنداردىڭ ۇلەس سانى وتە كوپ. بۇل دەرت ادەتتە 30-40 جاستاعى جانە ودان دا ەرەسەك ايەلدەردە ءجيى كەزدەسەدى. 2015 -جىلى قازاقستاندا 1826 ايەلدەن جاتىر موينى ىسىگى انىقتالدى. 600 كەلىنشەك وسى اۋرۋدان كوز جۇمدى. وسى دەرتكە شالدىققانداردىڭ سانى 11578 ادامدى قۇراپ وتىر.
