قىزىلوردادا جىلدىڭ ۇزدىك سپورتشىلارى ماراپاتتالدى
اۋداندىق دەنە شىنىقتىرۋ جانە سپورت بولىمدەرى مەن سپورت مەكتەپتەرى وبلىستىق دەنە شىنىقتىرۋ جانە سپورت باسقارماسىنىڭ ديپلومدارىمەن ماراپاتتالدى.
بۇل تۋرالى قازاقپارات ح ا ا ءتىلشىسى وبلىستىق دەنە شىنىقتىرۋ جانە سپورت باسقارماسىنا سىلتەمە جاساپ حابارلادى.
اۋىر اتلەتيكادان وليمپيادا ويىندارىنىڭ قولا جۇلدەگەرى - الەكساندر زايچيكوۆ، ەركىن كۇرەستەن وليمپيادا ويىندارىنىڭ قاتىسۋشىسى - عالىمجان وسەربايەۆ، مانەرلەپ سىرعاناۋدان قىسقى جاس وسپىرىمدەر وليمپيادا ويىندارىنىڭ قولا جۇلدەگەرى - ەليزابەت تۇرسىنبايەۆا، بايداركا مەن كانوەدە ەسۋدەن الەم كۋبوگىنىڭ كۇمىس جۇلدەگەرى مەرەي مەدەتوۆ «جىلدىڭ ۇزدىك سپورتشىلارى» اتاندى.
«جىلدىڭ ۇزدىك جاتتىقتىرۋشىسى» دەگەن مارتەبەلى اتاققا اۋىر اتلەتيكادان ق ر ەڭبەك سىڭىرگەن جاتتىقتىرۋشىسى ارمان ابدىرايەۆ، بايداركا مەن كانوەدە ەسۋدەن وبلىستىڭ اعا جاتتىقتىرۋشىسى مۇحيتدين ميەربەكوۆ جانە ەركىن كۇرەستەن ق ر ەڭبەك سىڭىرگەن جاتتىقتىرۋشىسى، وبلىستىڭ اعا جاتتىقتىرۋشىسى ءابۋتالىپ امانوۆ لايىق دەپ تانىلدى. سونداي-اق، جىل قورىتىندىسى بويىنشا سپورتتىق-بۇقارالىق جۇمىستاردى جولعا قويۋدا جاقسى جۇمىسىمەن تانىلعان اۋداندىق دەنە شىنىقتىرۋ جانە سپورت بولىمدەرى مەن سپورت مەكتەپتەرى ماراپاتتالدى.
اتاپ ايتساق، قىزىلوردا قالاسى ءبىرىنشى ورىندى جەڭىپ السا، جاڭاقورعان - ەكىنشى، سىرداريا - ءۇشىنشى ورىنداردى يەلەندى.
سپورت مەكتەپتەر اراسىندا 1№ وبلىستىق وليمپيادالىق رەزەرۆتىڭ مامانداندىرىلعان بالالار- جاس وسپىرىمدەر مەكتەبى ءبىرىنشى ورىندى، 2№ وبلىستىق وليمپيادالىق رەزەرۆتىڭ مامانداندىرىلعان بالالار- جاس وسپىرىمدەر مەكتەبى ەكىنشى ورىندى، 15№ قارماقشى اۋدانىنىڭ وليمپيادالىق رەزەرۆتىڭ مامانداندىرىلعان بالالار-جاس وسپىرىمدەر مەكتەبى ءۇشىنشى ورىندى ەنشىلەدى.
