قازاقستان- يران كولىك الەۋەتىن بىرلەسە پايدالانۋى قاجەت - ەلباسى
دەپ حابارلايدى قازاقپارات.
«پرەزيدەنت رۋحاني مىرزامەن بىرگە بۇگىن ەكىجاقتى قارىم- قاتىناستى تەرەڭدەتۋ ءۇشىن، دامىتۋ ءۇشىن ءبىز سول جولداردى تالقىلادىق. قازاق- يران ديالوگى اياسىندا قارىم- قاتىناسىمىز كەڭەيىپ، جۇيەلى تۇرگە ءتۇسىپ كەلە جاتىر. باستى ماقساتىمىز - ەكى حالىقتىڭ دوستىق قارىم- قاتىناسىن ودان ارى نىعايتۋ. كەلىسسوزدەر بارىسىندا ساۋدا- ەكونوميكا، ينۆەستيتسيا، ارىپتەستىكتى نىعايتۋ جولدارىنا باسا نازار اۋداردىق»، - دەدى مەملەكەت باسشىسى.
ەلباسى كەلىسسوزدەر بارىسىندا ەكى ەلدىڭ ءوزارا ءىس- قيمىلىندا باسىمدىعى بار بىرنەشە ماسەلە قارالعانىن اتاپ ءوتتى. ەكى ەلدىڭ اراسىنداعى ترانزيتتىك كولىك سالاسىنداعى زور الەۋەتتى بىرلەسە پايدالانۋ قاجەتتىگىن ەسكەرتە كەتتى.
«وزدەرىڭىز بىلەتىن قازاقستان- تۇركىمەنستان- يران تەمىر جولى وڭىردەگى ءتيىمدى كولىك كوممۋنيكاتسياسى بولىپ سانالادى. تەك قانا قازاقستاننان يرانعا ەمەس، پارسى شىعاناعىنا شىعىپ سول وڭىردەگى مەملەكەتتەرمەن ەكونوميكالىق قارىم- قاتىناس جاساۋعا مۇمكىنشىلىك بەرەدى. بۇل جەرلەردە، يران اۋماعىندا استىق جانە كونتەينەر تەرمينالدارىن بىرلەسىپ سالۋ ءقازىر قولعا الىنىپ جاتىر»، - دەدى نازاربايەۆ.
اۆتور: مارلان جيەمباي
