بويجەتكەندى قورعايمىن دەپ قازا تاپقان پوليتسەي «ەرلىگى ءۇشىن» مەدالىمەن ماراپاتتالدى - فوتو
بۇگىن الماتى وبلىستىق ىشكى ىستەر دەپارتامەنتىندە ەل تاۋەلسىزدىگىنىڭ 25 جىلدىعىنا ارنالعان سالتاناتتى شارادا مارقۇمعا تيەسىلى ناگرادا ونىڭ اناسىنا تابىس ەتىلدى، دەپ حابارلايدى قازاقپارات ءتىلشىسى.
وقيعا ورىن العان ءتۇنى پوليتسيا قىزمەتكەرى ازامات مۇرتبايەۆ تالدىقورعان قالاسىنداعى ءدامحانا ماڭىنان ماس ەر ادامنىڭ جاس قىزعا ءتيىسىپ جاتقانىن بايقاپ قالادى. بۇزاقىنىڭ بەيادەپ ارەكەتىنەن قىزدى قۇتقارماق بولعان ول دەرەۋ كومەككە ۇمتىلادى. الايدا، ىشىمدىككە ەلىگەن باسبۇزار قولىنا پىشاق الىپ، اراشاعا كەلگەن پوليتسيا قىزمەتكەرىنە شابۋىل جاسايدى. ا. مۇرتبايەۆ اۋرۋحاناعا جەتكىزىلگەنىمەن، اۋىر جاراقاتتان قايتىس بولدى. مەدال مارقۇمنىڭ اناسى الما مۇرتبايەۆاعا تابىستالدى.
ەسكە سالا كەتەيىك، تاۋەلسىزدىكتىڭ 25 جىلدىعىنا ارنالعان سالتاناتتى شاراعا ىشكى ىستەر دەپارتامەنتىنىڭ، ۇلتتىق ۇلاننىڭ جەكە قۇرامى، ءى ءى و ارداگەرلەرى مەن قىزمەت بابىندا قايتىس بولعان قىزمەتكەرلەردىڭ تۋىسقاندارى قاتىسقان بولاتىن. 
جيىندا ءسوز سويلەگەن وبلىستىق ىشكى ىستەر دەپارتامەنتىنىڭ باسشىسى، پوليتسيا گەنەرال- مايورى مۇرات ۇرۇمحانوۆ قىزمەتكەرلەردى تاۋەلسىزدىك كۇنىمەن قۇتتىقتاپ، اتقارىلعان شارالارعا دا توقتالىپ ءوتتى. ونىڭ ايتۋىنشا، بيىل الماتى وبلىسى اكىمدىگىنىڭ قولداۋىمەن قايتا جوندەۋدەن وتكەن كينولوگيالىق قىزمەت ورتالىعى اشىلدى. تۇرعىن ۇيمەن بىرىكتىرىلگەن 5 ۋچاسكەلىك پوليتسيا پۋنكتى قولدانىسقا بەرىلگەن. سالتاناتتى شارا بارىسىندا دەپارتامەنتتىڭ 12 قىزمەتكەرى «قازاقستان رەسپۋبليكاسىنىڭ تاۋەلسىزدىگىنە 25 جىل» مەرەيتويلىق مەدالىمەن، 6 وتباسى مۇشەسى العىس حاتپەن جانە ەستەلىك سىيلىقتارمەن، سونداي- اق ءبىرقاتار قىزمەتكەرلەر «قۇقىق ءتارتىبىن قامتاماسىز ەتۋگە قوسقان ۇلەسى ءۇشىن» مەدالىمەن جانە ىشكى ىستەر ءمينيسترىنىڭ «قۇرمەت گراموتاسىمەن» ماراپاتتالدى.
سونىمەن قاتار، 25 جاس قىزمەتكەر «پوليتسيا لەيتەنانتى» ارنايى اتاعىن الىپ، قازاقستان رەسپۋبليكاسىنا ادال قىزمەت ەتۋگە انت ەتتى.
اۆتور: سامال قابىشەۆا
