نازاربايەۆ: قازاقستان مەن يزرايلدى تىكەلەي اۋە جولىمەن بايلانىستىرۋ قاجەت
بۇل جايىندا بۇگىن اقوردادا يزرايل پرەمەر- ءمينيسترى بينيامين نەتانياحۋمەن كەڭەيتىلگەن قۇرامداعى كەلىسسوزدەردەن كەيىنگى بىرلەسكەن مالىمدەمە بارىسىندا ق ر پرەزيدەنتى نۇرسۇلتان نازاربايەۆ ايتتى، دەپ حابارلايدى قازاقپارات.
«قازىر ءبىز جۇمىس توبىن قۇرۋ، كەلىسىمشارت، جول كارتاسى جوسپارىن قۇرۋ تۋرالى ۋاعدالاستىق. مۇنداي قۇجاتتار تولىق دايىن بولعاننان كەيىن ءبىز پرەمەر- مينيستر مىرزامەن بىرگە وعان قول قويىپ، بىرلەسە جۇمىس ىستەي باستايتىن بولامىز»، - دەپ اتاپ ءوتتى ەلباسى.
وسى رەتتە قازاقستان پرەزيدەنتى ەكى ەلدىڭ اراسىنداعى ساۋدا- ەكونوميكالىق ىنتىماقتاستىقتى جاقسارتۋعا سەپتىگىن تيگىزە الاتىن ءبىرقاتار ماسەلەگە دە كەڭىنەن توقتالىپ ءوتتى.
«بيزنەس ءوزارا جۇمىس ىستەۋى ءۇشىن بىزگە ەلدەرىمىز اراسىندا تىكەلەي اۋە بايلانىسى، ۆيزاسىز رەجىم قاجەت. بۇل ماسەلەنى قازاقستان ءوز تارابىنان شەشۋدە، ال ەكونوميكالىق ماسەلەلەر بۇعان مۇددەلى كومپانيالاردا تالقىلاناتىن بولادى»، - دەدى مەملەكەت باسشىسى. سونىمەن قاتار ەلباسى بۇگىن قازاقستاندىق- يزرايلدىك بيزنەس فورۋمنىڭ وتەتىندىگىن ەسكەرتتى.
«ءبىزدىڭ ىسكەر ادامدارىمىز ءتۇيىسۋ نۇكتەلەرىن تىڭعىلىقتى تالقىلايدى دەپ ويلايمىن. يزرايل ەۋرازيالىق ەكونوميكالىق وداقپەن اراداعى ەركىن ساۋدا اۋماعىنا قاتىسۋعا قىزىعۋشىلىق تانىتۋدا. قازاقستان ۇيىمعا ءتوراعا رەتىندە قولدايدى. ءبىز تەك قانا بۇل باعىتتا ەمەس، سونىمەن بىرگە مەديتسينا، ادامدارىمىزدى وقىتۋ، جاڭا تەحنولوگيالار، يندۋستريا ماسەلەلەرىندە دە ىنتىماقتاسا الاتىندىعىمىزدى ايتتىق جانە يزرايلدىڭ زور جەتىستىگى بار»، - دەدى نازاربايەۆ.
ق ر پرەزيدەنتى قازاقستاننىڭ «نۇرلى جول» باعدارلاماسىنىڭ ۇلى جىبەك جولى جوباسىمەن تۇيىندەسۋى يزرايلدىڭ كولىك سالاسىنا قىزىعۋشىلىعىن وياتاتىندىعىن اتاپ ءوتتى.
