نەلىكتەن دونالد ترامپقا قازاقستانمەن دوس بولۋ كەرەك
ا ق ش جاڭا سايلانعان پرەزيدەنتى دونالد ترامپقا حابارلاسىپ، قۇتتىقتاعان الەم كوشباسشىلارىنىڭ اراسىندا قازاقستان كوشباسشىسى نۇرسۇلتان نازاربايەۆ تا بار. كەي اقپارات كوزدەرى كەڭەس ءداۋىرى قۇلاعاننان كەيىنگى تاۋەلسىز قازاقستاننىڭ جەتىستىكتەرىن ترامپتىڭ «عاجايىپ» دەپ اتاعانىن حابارلاۋدا، دەپ اتاپ ءوتتى اۆتور.
ەگەر ترامپ 90 -جىلداردان كەيىنگى ەكونوميكالىق جەتىستىكتەردى ايتسا، شىندىققا جاناسادى. ارينە، ورتالىق ازيانىڭ كوپتەگەن مەملەكەتى ايتارلىقتاي ەكونوميكالىق كەدەرگىلەرگە تاپ بولدى، ءبىراق قازاقستان ءوز كورشىلەرىنەن وزىق شىقتى. تاۋەلسىزدىكتىڭ العاشقى جىلدارى ەل ەكونوميكاسى داعدارىستى باستان وتكەردى.
الايدا، 2000 -جىلدان باستاپ وڭ وزگەرىستەر بولا باستادى - جىل سايىن قازاقستان ەكونوميكاسى ورتا ەسەپپەن 8 پايىزعا ءوستى. 1998 -جىلى الەمدىك «مۇرا» قورى (The Heritage Foundation) ەكونوميكالىق ەركىندىك جاعىنان قازاقستاندى 136- ورىنعا قويسا، قازىرگى ۋاقىتتا قازاقستان 68-ورىنعا كوتەرىلىپ، فرانسيا، يتاليا سىندى باتىس ەلدەرىن قۋىپ جەتتى.
ءبىراق، قازاقستان مۇنىمەن توقتاپ قالعىسى كەلمەيدى: 2012 -جىلى ۇكىمەت 2050 -جىلعا دەيىن الەمنىڭ دامىعان 30 ەلىنىڭ قاتارىنا ەنۋدى ماقسات ەتىپ قويدى. قازاقستاننىڭ ەكونوميكالىق قارقىنىن ترامپ سەكىلدى «عاجايىپ» دەيسىز بە، ەكونوميكالىق ىنتىماقتاستىق جانە دامۋ ۇيىمى سەكىلدى «اسەرلى» دەيسىز بە، قالاي سيپاتتاساڭىز دا ءوز ەركىڭىز، ون جەتى ميلليون حالقى بار قازاقستان سوڭعى 20 جىلدا عالامات جەتىستىككە قول جەتكىزدى.
ترامپ اكىمشىلىگىنە الەمدىك ارەنادا كومەكتەسۋدە قازاقستاننىڭ ءرولى قانداي بولماق، بۇل تۋرالى ترامپتىڭ ويلانۋى قاجەت. وزگە مەملەكەتتەرمەن سالىستىرعاندا، قازاقستان كەڭەس وداعىنان مۇراعا قالعان يادرولىق ارسەنالدان الدەقاشان باس تارتقان. سونداي- اق، ماقالادا قازاقستان مەن اقش- تىڭ ەكسترەميزممەن كۇرەستە ىنتىماقتاستىقتا جۇمىس ىستەي الاتىنى ايتىلعان. اۆتور پرەزيدەنت اكىمشىلىگىنە قازاقستاننىڭ مۇناي- گاز سالاسىنداعى الەۋەتىنە نازار اۋدارۋعا كەڭەس بەرەدى. قازاقستان ەۋروپانى رەسەيلىك گازعا تاۋەلدىلىكتەن قۇتقارادى. 90-جىلداردان باستاپ Chevron جانە Exxon سىندى ەنەرگەتيكالىق الىپتار قازاقستانداعى الەم بويىنشا ەڭ ءىرى كەن ورىندارىن - تەڭىز، قاشاعان، قاراشىعاناقتى يگەرۋگە كومەكتەستى. ازىرگە ترامپ ءبارىن تۇسىنەتىن سەكىلدى. سونىمەن قاتار، قازاقستان ب ۇ ۇ قاۋىپسىزدىك كەڭەسىندەگى تۇراقتى ەمەس مۇشەلىگى كەزىندە ا ق ش- قا پايدالى سەرىكتەس بولا الادى. ا ق ش- قا ورتالىق ازيالىق دوستار اۋاداي قاجەت، اسىرەسە ۆاشينگتونمەن مۇددەلەس قازاقستانمەن دوس بولۋ كەرەك.
