ەلوردالىق پوليتسەيلەر تەاتر ساحناسىندا سپەكتاكل قويدى- فوتو
يدەيا اۆتورى - استانا قالاسى ءى ءى د باستىعى پوليتسيا گەنەرال- مايورى امانتاي اۋباكىروۆ، دەپ حابارلايدى قازاقپارات.
امانتاي اۋباكىروۆتىڭ سوزىنشە، قويىلىم بارلىق قۇقىق قورعاۋ ورگاندارى قىزمەتكەرلەرىنىڭ باتىرلىق، ەرلىك قارەكەتتەرىن، سونىمەن قاتار وتان الدىنداعى جانە حالىققا بەرگەن انتىنىڭ ادالدىعىن كورسەتكەن تۋىندى. «اكە جولى» سپەكتاكلىنىڭ باستى كەيىپكەرىنىڭ پروتوتيپى رەتىندە ەرلىكپەن قازا بولعان اقمولا وبلىسى ءى ءى ب قىلمىستىق ىزدەستىرۋ ءبولىمىنىڭ جەدەل ۋاكىلى، ميليتسيا كىشى لەيتەنانتى جانايدار جيرەنتايەۆ الىندى. سپەكتاكلدە ەكەۋى دە ىشكى ىستەر ورگاندارىنىڭ قىزمەتكەرلەرى بولىپ تابىلاتىن اكەسى ءادىل مەن ۇلى قايساردىڭ ەرەن ەرلىگى باياندالادى. جاس جىگىت ءادىل اۋعانستاندا كەڭەس اسكەرلەرىنىڭ شەكتەۋلى كونتينگەنتىنىڭ قۇرامىندا اسكەري قىزمەتىن وتكەرۋ كەزىندە وق جاراقاتىن الادى. دەموبيليزاتسيالانعاننان كەيىن ءى ءى ب- گە قىزمەتكە تۇرادى. جەدەل تەرگەۋ توبىن شاقىرتۋلاردىڭ بىرىنە باستاپ بارعان ول قىلمىسكەردى ۇستاۋ كەزىندە ارتى ولىمگە الىپ كەلگەن جاراقات الادى. ءادىلدىڭ ۇلى قايسار اناسىنىڭ قارسى بولعانىنا قاراماستان اكەسىنىڭ جولىن جالعاستىرماقشى بولادى. ىشكى ىستەر بولىمشەلەرىنىڭ بىرىندە قىزمەت اتقارا ءجۇرىپ قايسار ءوز ءومىرىن قاتەرگە تىگىپ، ۇيىمداسقان قىلمىستىق توپتىڭ جولىن كەسەدى. كورسەتكەن ەرلىگى مەن باتىلدىعى ءۇشىن قايسار مەملەكەتتىك ناگراداعا ۇسىنىلادى. ءادىلدىڭ اكەسىنىڭ ءرولىن پوليتسيا اعا لەيتەنانتى جۋماجان وتەگەنوۆ، ۇلى قايساردىڭ ءرولىن پوليتسيا اعا لەيتەنانتى جاندار بولاتبەك وينادى.
