الماتىدا تۋريستىك ۇيىمدار ۋنيۆەرسيادا نىساندارىن ارالاپ كوردى

اقپاراتتىق تۋر كەزىندە 13-14- جەلتوقساندا تۋريستىك اگەنتتىك وكىلى سەگىز سپورت نىساندارىنا، ناقتىراق ايتقاندا، دۇنيەجۇزىلىك قىسقى ۋنيۆەرسيادا جارىس اياسىندا وتەتىن «شىمبۇلاق» تاۋ-شاڭعى كۋرورتى، «مەدەۋ» سپورت كەشەنى، «سۇڭقار» حالىقارالىق شاڭعى ترامپليندەر كەشەنى، بالۋان شولاق اتىنداعى سپورت جانە مادەنيەت سارايى، «الاتاۋ» شاڭعى جانە بياتلون كەشەنى، «تاباعان» سپورت-ويىن-ساۋىق كەشەنى، «الماتى ارەنا»، «حالىق ارەنا» مۇز سارايىنا بارادى.

«ۋنيۆەرسيادانىڭ وتۋىنە بايلانىستى ءبىزدىڭ قالامىزعا شەتەلدىك تۋريستەرمەن قاتار، ەلىمىزدىڭ تۇكپىر-تۇكپىرىنەن قوناقتار كەلەدى. وسىعان وراي، تۋريستىك اگەنتتىكتەر سپورت نىساندارىن الماتى قالاسى مەن وبلىسى بويىنشا جۇرگىزىلەتىن ەكسكۋرسيالىق تۋرلارعا قوسادى. قازىردىڭ وزىندە ۋنيۆەرسيادا نىساندارىن ارالاپ شىعۋعا ارنالعان «سپورتتىق الماتى» ەكسكۋرسيالىق تۋرى جاسالدى»، - دەدى قازاقستان تۋريستىك قاۋىمداستىعىنىڭ پرەزيدەنتى راشيدا شايكەنوۆا.

ايتا كەتەيىك، 2017-جىلعى 28-دۇنيەجۇزىلىك قىسقى ۋنيۆەرسيادا ويىندارى الماتى قالاسىندا 29- قاڭتار مەن 8- اقپان ارالىعىندا وتەدى.

ۋنيۆەرسيادا باعدارلاماسىنا 12 سپورت ءتۇرى ەندى: مانەرلەپ سىرعاناۋ، شورت-ترەك، تاۋ شاڭعىسى، شايبالى حوككەي (ەرلەر، ايەلدەر)، سنوۋبورد، بياتلون، شاڭعى جارىسى، كەرلينگ، شاڭعىمەن تۇعىردان سەكىرۋ، شاڭعى قوس سايىسى، كونكيمەن جۇگىرۋ، فريستايل.

جارىسقا 2 مىڭعا جۋىق سپورتشى قاتىسادى. ۋنيۆەرسيادا بارىسىندا 3 مىڭ ەرىكتى جۇمىس ىستەمەك. ونىڭ ىشىنە شەتەلدىك ەرىكتىلەر دە بار. 30 مىڭ وتاندىق جانە شەتەلدىك تۋريست كەلەدى دەپ جوسپارلانعان. الەمنىڭ 80 ەلىنەن 1 ميلليارد ادام جارىستاردى تەلەترانسلياتسيا ارقىلى كورە الادى.

اۆتور: الماس مۇقاش ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى