ەلباسى: تەڭگەنىڭ ەنگىزىلگەن ەركىن ايىرباس باعامى ءوزىن- ءوزى اقتادى

كەزدەسۋ بارىسىندا ۇلتتىق بانك ءتوراعاسى قازاقستان پرەزيدەنتىنە 2016 -جىلعى 11 ايداعى قارجى نارىعىنىڭ بۇگىنگى ناتيجەلەرى تۋرالى باياندادى. ۇلتتىق بانك باسشىسى تەڭگە باعامىنىڭ الەمدىك نەگىزگى ۆاليۋتالارعا قاتىستى تۇراقتانىپ كەلە جاتقانىن اتاپ ءوتتى.

- ۇلتتىق بانك سوڭعى ايلاردا ۆاليۋتا ساۋداسىنا قاتىسىپ وتىرعان جوق. وسىلايشا، ايىرباس باعامى ۇلتتىق بانكتىڭ ارالاسۋىنسىز، وتە ەركىن جاعدايدا قالىپتاسۋدا. نارىقتا قۇنسىزدانۋ قاتەرى ازايدى. تەڭگە %3,4 عا نىعايدى، نەگىزىنەن بۇل بيىلعى جەلتوقساندا مۇناي باعاسىنىڭ كوتەرىلۋىنە بايلانىستى بولىپ وتىر، - دەدى د. اقىشەۆ.

سونداي-اق، ۇلتتىق بانك ءتوراعاسى بيىلعى قاراشا ايىنىڭ قورىتىندىسى بويىنشا ينفلياتسيا كورسەتكىشى قايتادان ءبىر تاڭبالى سانعا ورالىپ، 2016 -جىلعى 11-ايدا %7,5 بولىپ وتىرعانىن مالىمدەدى. ەلباسى ۇلتتىق ۆاليۋتانىڭ ەركىن ايىرباس باعامىنا كوشۋى بىلتىر وڭ ناتيجە بەرگەنىن اتاپ ءوتتى. - تەڭگەنىڭ ەنگىزىلگەن ەركىن ايىرباس باعامى ءوزىن-ءوزى اقتادى. ايىرباس باعامى الەمدىك باعاعا بايلانىستى بولعاندىقتان، ءبىرقاتار اۋىتقۋلار ورىن الۋى مۇمكىن. الايدا، ءبىز ءتيىستى شارالار قابىلداۋعا ءازىرمىز، - دەدى نۇرسۇلتان نازاربايەۆ.

مەملەكەت باسشىسى بانك جۇيەسىندەگى احۋالدى ودان ءارى تۇراقتاندىرۋعا قاتىستى جانە قارجى نارىعىنداعى جۇمىس جونىندە ءبىرقاتار ناقتى تاپسىرما بەردى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى