تاماقتانۋشى عالىم رەسەيدىڭ ءسۇتىن نەلىكتەن الماۋ كەرەكتىگىن ايتتى
«بيە سۇتىنەن ايران، يوگۋرت، بالمۇزداق جاساي الامىز جانە بۇل ءونىم پايدالى، سەبەبى ولاردىڭ قۇرامىندا ترانسماي قىشقىلدارى جوق. جىلقى ءسۇتىنىڭ ەرەكشە قاسيەتىنە توقتالساق، جالپى وندا ترانسمايلارى بولمايدى. سيىردىڭ ءسۇتىنىڭ ءوزىنىڭ قۇرامىندا تابيعي ترانسماي قىشقىلى بار، ونىڭ دەنساۋلىققا كەلتىرەتىن زيانى زەرتتەلگەن. سوندىقتان بيە ءسۇتىنىڭ تابيعي تاتتىلىگىنىڭ ارقاسىندا ءتۇرلى ونىمدەردى شىعارۋعا مۇمكىندىك مول»، - دەدى شارمانوۆ «قازاقپارات» تىلشىسىنە بەرگەن سۇحباتىندا.
ونىڭ سوزىنە قاراعاندا، بۇگىندە اسقىنداپ تۇرعان اۋرۋلاردىڭ ءبىرى - ول ديابەت، قان قىسىمى دەرتتەرى. وسى رەتتە ءبىرقاتار اۋرۋلاردىڭ تۋىنداۋىنا ترانسماي قىشقىلىنىڭ اسەرى بار كورىنەدى.
«ءسۇتتى ءبىز كۇندەلىكتى پايدالانامىز. سونىمەن قاتار اتاپ وتەر تاعى ءبىر جايت، بۇگىندە سيىر ءسۇتى تازا ەمەس. ماسەلەن، رەسەيلىك ءسۇت ونىمدەرى الدامشى تاعامدار جانە مۇنى رەسەي تاراپىنىڭ ماماندارى وزدەرى دە مويىنداپ وتىر. سوندىقتان بۇل بۇگىندە دەنساۋلىققا قاۋىپ ءتوندىرىپ تۇرعانى انىق. وسى ورايدا حالىققا تەك تازا ونىمدەردى ۇسىنۋ الدا تۇرعان ۇلكەن مىندەت»، - دەدى ت. شارمانوۆ.
ايتا كەتەيىك، بۇگىن اقوردادا ق ر مەملەكەتتىك حاتشىسى گۇلشارا ءابدىقالىقوۆا مەملەكەتتىك، قوعامدىق قىزمەتتە سىڭىرگەن ەڭبەگى، ەلدىڭ الەۋمەتتىك- ەكونوميكالىق جانە مادەني دامۋىنا قوسقان ەلەۋلى ۇلەسى ءۇشىن Ⅲ دارەجەلى «بارىس» وردەنىن «قازاق تاماقتانۋ اكادەمياسى ق ب» ج ش س پرەزيدەنتى تورەگەلدى شارمانوۆقا تاپسىرعان بولاتىن.
