ەندىگى جاستار پروكۋراتۋراعا اعا-كوكەسىز-اق جۇمىسقا تۇرۋعا بولادى - اسانوۆ

ال مامانداردىڭ بىلىكتىلىگىن باعالاۋ بارىسىندا ساراپشىلاردىڭ وزدەرى ۇمىتكەرلەردىڭ ەسىمدەرىن بىلمەيتىن بولادى، دەپ حابارلايدى قازاقپارات ءتىلشىسى. «بۇرىن ماعان كەلەتىن ادامدار ىلعي بىرەۋدىڭ تۇيىندەمەسىن (رەزيۋمە) تىقپالاي بەرۋشى ەدى. ەندى، ونداي ارەكەتتەرگە جول جوق. نەگە؟ سەبەبى قازىرگى كەزدە ءبىز مامانداردى ىرىكتەۋدىڭ ءبىرىڭعاي ورتالىعىن قالىپتاستىرىپ جاتىرمىز. ونىڭ جۇمىسىنا مەن ءوزىم كىرىسە المايمىن. وعان مەنىڭ ءسوزىم وتپەيدى. سەبەبى باعالاۋ جۇمىستارىن تاۋەلسىز ساراپشىلار جۇرگىزەدى. ولاردىڭ وزدەرى ۇمىتكەرلەردىڭ كىم ەكەنىن بىلمەيتىن بولادى»، - دەيدى باس پروكۋرور.

ونىڭ ايتۋىنشا، بۇگىندە پروكۋراتۋرا ورگاندارىنا ۇزدىك مامانداردى ىرىكتەۋ شارالارى دا ءوز ناتيجەسىن بەرە باستادى. «وسىنىڭ ءبارى قازىرگى جاستارعا قاجەت. ولار پروكۋراتۋراعا اعا-كوكەسىز دە جۇمىسقا تۇرۋعا بولاتىنىنا كوز جەتكىزۋلەرى كەرەك. ويتكەنى ءبىز ءبىر ساۋالنامانى وتكىزدىك. سوندا جاستاردىڭ 93 پايىزى پروكۋراتۋراعا قىزمەتكە تۇرۋ ءۇشىن تانىس-تامىرلاستار قاجەت دەپ جاۋاپ بەرگەن. جوق، ولاي ەمەس. بارلىعى جاستاردىڭ وزدەرىنە بايلانىستى. ۇمىتكەردىڭ ءبىلىمى، كاسىبي دايىندىعى، قوعامدىق پوزيتسياسى مىقتى بولسا، ونى ەشبىر تانىسسىز- اق جۇمىسقا الادى»، - دەپ اتاپ كورسەتتى ج. اسانوۆ.

ايتا كەتەيىك، بۇگىن استانادا كاسىبي مەملەكەتتىك اپپاراتتى قالىپتاستىرۋ ماسەلەلەرىنە ارنالعان جيىندا باس پروكۋرور وسى ۆەدومستۆونىڭ جۇمىسىنا قولبايلاۋ بولىپ وتىرعان نەگىزگى ماسەلەنى اتاپ كورسەتتى. سونداي- اق ول ءوزىن- ءوزى ورتەگەن ادام ءۇشىن بىلىكسىز مامانداردى كىنالاپ، جاقىندا تاعى ءۇش پروكۋروردىڭ سوتتالعانىن جەتكىزدى.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى