وتاندىق كومپانيالار شەتەلدىك ماماندارعا نەگە قۇمار
قازاقپارات تىلشىسىنە سۇحبات بەرگەن «Optimum Recruitment Executive Search» رەكرۋتينگتىك اگەنتتىكتىڭ ديرەكتورى دينا ءابىلحوجينا ءدال وسى سۇراققا جاۋاپ بەردى. «ەگەردە ەكسپاتتار (شەتەلدىك ماماندارعا ارنالعان سلەنگ اتاۋ) قازاقستانعا جۇمىس ىستەۋگە كەلەر بولسا، وندا ولار جوعارى توپ بوس جۇمىس ورىندارىن يەلەنەدى. ول ماركەتينگ جونىندەگى ديرەكتور نەمەسە كومپانيالاردىڭ، قارجى ينستيتۋتتارى وكىلدىكتەرىنىڭ، كەڭسەلەرىنىڭ باسشىلارى بولۋى مۇمكىن. نەگىزىنەن بيزنەستى قالىپتاستىراتىن ستراتەگيالىق پوزيتسيالارعا ەكسپاتتار شاقىرىلادى. ال تومەن قىزمەتتەرگە ولاردى تارتۋدىڭ ەش قاجەتتىگى دە جوق»، - دەدى ءابىلحوجينا.
ونىڭ سوزىنە قاراعاندا، بۇگىندە قازاقستاندىق كومپانيالار ءارتۇرلى ەلدەردىڭ ماماندارىن قىزمەتكە شاقىرادى. دەگەنمەن، ولار ورىس تىلىنە جەتىك ۋكراينا مەن رەسەي ماماندارىنا كوبىنە باسىمدىق بەرگەنىمەن الىس شەت ەلدەردەن كەلەتىن ەكسپاتتار بار. «نەگىزىنەن ولار IT سالاسىنىڭ ماماندارى. ياعني، ولار بەلگىلى ءبىر جۇيەنىڭ ءتۇرلى مودۋلدەرىنە قاتىستى كەڭەسشىلەرى بولۋى ىقتيمال. ال ولارعا باسىمدىق بەرىلۋىنىڭ باستى سەبەبى شەتەلدە بۇل نارىق وتە جاقسى دامىعان ءارى بەلگىلى ءبىر كومپانيانىڭ، حالىقارالىق كەڭسەنىڭ جۇمىسى دۇرىس جولعا قويىلعان. سول سەبەپتى ولاردىڭ ماماندارىنىڭ بىزگە قاراعاندا شەتەلدىك تاجىريبە الۋعا مۇمكىنشىلىكتەرى مول. ماسەلەن، ول رەسەيدە جۇمىس ىستەپ، كەيىننەن گەرمانياعا جانە ودان ارى حالىقارالىق تاعايىنداۋمەن ىلگەرىلەۋى مۇمكىن. ياعني، ادام ءبىر كومپانيانىڭ قۇرىلىمىندا ءتۇرلى ەلدەردە جۇمىس جاساي الادى»، - دەپ ءتۇسىندىردى ول.
اگەنتتىك باسشىسىنىڭ ايتۋىنشا، قازاقستاندا مۇنداي مۇمكىنشىلىك ۇسىناتىن كومپانيالار تىم از. «ال شەتەلدە بۇل ىنتالاندىرۋدىڭ ماڭىزدى قوزعاۋشى كۇشى سانالادى. سول سەبەپتى ءبىلىمى مىقتى «بولاشاقتىق» بولسا دا، ءتىلدى كەرەمەت مەڭگەرسە دە تەك قازاقستاندا عانا جۇمىس ىستەگەن ادامنىڭ حالىقارالىق جۇمىس تاجىريبەسى كەمشىن تۇسەدى. دەگەنمەن، ءبىزدىڭ ماماندار شەتەلدىكتەردەن كەم ەمەس. ءتىپتى، ولاردان اسىپ تۇسەتىندەرى دە بار»، - دەدى ءابىلحوجينا. سونىمەن قاتار ول بۇگىنگى كۇنى ەلىمىزدەگى ەكسپاتتاردىڭ سانى كەمىپ كەلە جاتقاندىعىن ايتتى.
