قازاق سازگەرىمەن دوس بولعان قىتايلىق كومپوزيتور جايلى فيلم ءتۇسىرىلىپ جاتىر
بۇل فيلمنىڭ ءتۇسىرۋ جۇمىستارى بويىنشا كەزدەسۋ وتكىزۋ ءۇشىن الماتىعا ارنايى قىتاي حالىق رەسپۋبليكاسىنىڭ تانىمال رەجيسسەرى شەريزات ياكۋب باستاعان Shineworks كينوكومپانياسىنىڭ ءتۇسىرۋ توبى كەلدى.
بىرلەسكەن جوبانى جۇزەگە اسىرۋ تۋرالى تالقىلاۋلار 2015 -جىلى 26 -قىركۇيەكتە قىتايدىڭ فۋجوۋ قالاسىندا وتكەن «جىبەك جولى» كينوفەستيۆالىنىڭ كوپرودۋكسيا جونىندەگى فورۋمدا باستالعان. 2016 -جىلى 2 -قاراشادا «قازاق فيلم» كينوستۋدياسى جانە قىتايدىڭ Shineworks كينوكومپانياسى اراسىندا «كومپوزيتور» اتتى فيلمدى بىرلەسىپ شىعارۋ جانە قارجىلاندىرۋ، سونىمەن قاتار بىرلەسىپ پروكاتقا شىعارۋ جونىندە كەلىسىمگە قول قويىلدى. 2016 -جىلدىڭ جەلتوقسان ايىنان باستاپ فيلم دايىندىق كەزەڭگە وتكەن بولاتىن. كارتينانىڭ ءتۇسىرۋ جۇمىستارى 2017 باستالىپ، تۇسىرىلىمدەردىڭ نەگىزگى بولىگى قازاقستاندا وتەدى.
فيلم الەمدىك ونەرگە ەلەۋلى ۇلەس قوسقان قىتايدىڭ تانىمال كومپوزيتورى شي شينحايدىڭ ءومىرى مەن ونەر جولىنا ارنالماق. ۇلى وتان سوعىسى جىلدارىندا (1941- 1943 -جىلدار ارالىعىندا) كومپوزيتور قازاقستاندا تۇرىپ، قازاقتىڭ تالانتتى كومپوزيتورى باقىتجان بايقاداموۆپەن دوس بولعان. كارتينا ەكى ەل اراسىنداعى ىنتىماقتاس پەن كومپوزيتورلاردىڭ دوستىعى تۋرالى سىر شەرتەدى.
«بۇگىنگە دەيىن ءبىراز جۇمىس اتقارىلدى. قازاقستان جاعىنان سەرىكتەستەرىمىزگە العىسىمىز شەكسىز. قىتايدا شي شينحاي تۋرالى، ونىڭ ءار جىلدارى ءومىرى تۋرالى باياندايتىن فيلمدەر كوپ، ءبىراق كومپوزيتوردىڭ قازاقستاندا تۇرىپ، وسىندا جۇمىس ىستەگەنى جونىندە كوبىسى بىلە بەرمەيدى. وسى ەلدە كومپوزيتوردى جىلى قارسى الىپ، ونىڭ شىعارماشىلىعىنا قولداۋ كورسەتكەنى تۋرالى ايتىپ بەرۋ ءبىز ءۇشىن وتە ماڭىزدى»، - دەدى «قازاق فيلمنىڭ» وكىلدەرىمەن كەزدەسۋ بارىسىندا فيلمنىڭ رەجيسسەرى شەريزات ياكۋب.
«قازاق فيلم» ءۇشىن بۇل قىتاي كينوگەرلەرىمەن جاسالعالى وتىرعان العاشقى جوبا. سوندىقتان دا ءبىزدىڭ تاراپتان بۇل جوباعا بىلىكتى ماماندار تارتىلىپ وتىر. ەكى ەل اراسىندا ىنتىماقتاستىق ورناتۋ ماقساتىندا قولعا الىنعان بۇل فيلمدى ابىرويمەن اتقارىپ شىعامىز دەگەن ويدامىن»، - دەدى كەزدەسۋ بارىسىندا ش. ايمانوۆ اتىنداعى «قازاق فيلم» ا ق پرەزيدەنتى باقىت قايىربەكوۆ.
