كوللەدج ستۋدەنتتەرى تەگىن تاماق ءىشىپ، شاكىرتاقى الاتىن بولدى
بۇل تۋرالى بۇگىن و ك ق- دا وتكەن باسپا ءسوز ءماسليحاتىندا ق ر ءبىلىم جانە عىلىم ۆيتسە- ءمينيسترى بيبىگۇل اسىلوۆا ءمالىم ەتتى، دەپ حابارلايدى قازاقپارات.
قازىرگى ۋاقىتتا ءبىلىم مينيسترلىگى تەگىن تەحنيكالىق جانە كاسىپتىك ءبىلىم بەرۋدىڭ جاڭا تەتىكتەرىن جاساقتاعان. 2021 - جىلعا دەيىن قازاقستاندا تەگىن ءبىلىم جۇيەسىمەن 671,5 مىڭ ادامدى قامتۋ كوزدەلگەن. «ءبىز تەگىن تەحنيكالىق جانە كاسىپتىك ءبىلىم بەرۋ جۇيەسىنىڭ جاڭا تەتىكتەرىن جاساقتادىق. ەگەر بۇرىن مەكتەپ بىتىرگەن تۇلەك جۇمىسشى بىلىكتىلىگىنە نەمەسە ورتا بۋىندى ماماندىقتارعا اقىلى نەمەسە مەملەكەتتىك تاپسىرىس نەگىزىندە جەكە- جەكە تۇسكەن بولسا، جاڭا مودەل بويىنشا، تۇلەك ورتا بۋىندى ماماندىققا جۇمىسشى بىلىكتىلىگى ارقىلى تۇسەدى دە، ەڭبەك نارىعىنا كىرەدى»، - دەيدى اسىلوۆا.
ونىڭ ۇستىنە، ءبىلىم بەرۋ، مەديتسينا جانە ونەر ماماندىقتارى بويىنشا وقىتۋ ءىشىنارا مەملەكەتتىك تاپسىرىسپەن جۇرسە، ەكونوميكا جانە زاڭگەر ماماندىقتارىنا وقىتۋ اقىلى بولادى.
«2017 -جىلى اتالمىش مودەل بويىنشا، ەڭ كوبى 142 مىڭ ادام قابىلداناتىنى جوسپارلانعان. ولاردىڭ ىشىندە، 40 مىڭ ادام جۇمىسشى ماماندىقتارى بويىنشا، 54 مىڭ ادام - 2 جۇمىسشى بىلىكتىلىگىن الىپ شىعاتىن ورتا بۋىندى ماماندىقتار، 32 مىڭى - ءبىلىم بەرۋ، مەديتسينا جانە ونەر ماماندىقتارى، 16 مىڭى - ەكونوميكالىق جانە زاڭگەرلىك ماماندىقتار. ءبىز جۇمىسشى ماماندىقتارىنا تۇسەتىن تۇلەكتەردىڭ سانىن ەكى ەسەگە ارتتىرۋدى ماقسات ەتىپ وتىرمىز. كەلەسى جىلدان باستاپ، جۇمىسكەر ماماندىقتارىندا وقيتىن تەحنيكالىق جانە كاسىپتىك ءبىلىم بەرۋ مەكەمەلەرىنىڭ ستۋدەنتتەرىن جەرگىلىكتى بيۋدجەتتەر ەسەبىنەن شاكىرتاقىمەن، جول اقىمەن جانە ءبىررەتتىك تەگىن تاماقپەن قامتاماسىز ەتۋ كوزدەلىپ وتىر»، - دەيدى ۆيتسە- مينيستر.
جاڭا باعدارلاما بويىنشا، اسىرەسە، ءبىلىم الۋعا قاراجاتى جوق، از قامتىلعان وتباسىدان شىققان جاستاردى كوپتەپ تارتۋ جوسپارلانعان. باعدارلامانى جۇزەگە اسىرۋ كەزىندە ەلىمىزدە جۇمىسسىزدىق دەڭگەيىن 4,8 پايىزعا دەيىن تومەندەتۋ كوزدەلەدى. 2021 - جىلعا قاراي تۇلەكتەردىڭ 40 پايىزعا جۋىعى جۇمىسشى ماماندىقتارىن يگەرەدى دەگەن بولجام بار.
ايتا كەتەيىك، 2017 -جىلدان باستاپ، كوللەدجدەردە، تەحنيكالىق جانە كاسىپتىك ءبىلىم بەرۋ وردالارىندا جۇمىسشى ماماندىقتارىنا وقىتۋ قازاقستاندا تەگىن جۇرگىزىلەدى.
اۆتور: جاسۇلان جولدىبايەۆ
