تانىمال كورەي ءانشىسى قازاق تىلىندە ءان ايتتى – فوتو، كەسكىن
كونسەرت ۇيىمداستىرۋشىلارى - قازاقستانداعى كورەيا ەلشىلىگىنىڭ كورەي مادەنيەت ورتالىعى ءانشى كونسەرتىن عانا ەمەس، ونىڭ كورەرمەندەرمەن كەزدەسۋىن دە ۇيىمداستىردى. كونسەرت بارىسىندا ءانشى تۋعان كۇنى كونسەرتپەن تۇسپا-تۇس كەلگەن تىڭدارماندارىن قۇتتىقتاپ، ءوز رەپەرتۋارىنداعى تاڭداۋلى ءانىن ورىنداپ بەردى.
ودان بولەك، كەز كەلگەن كورەرمەن ارنايى تاقتاعا سۇراقتار مەن تىلەكتەرىن قالدىرىپ كەتتى، كەيبىرىنە ءانشى كونسەرت ۇستىندە جاۋاپ بەردى.
«مەن قاردى وتە جاقسى كورەمىن. ماعان جاپونياداعى ساپپورو ۇنايدى، سەبەبى وندا قار كوپ. بۇگىن تاڭەرتەڭ قوناق ءۇي تەرەزەسىنەن قارعا ورانعان استانانى كورگەندە، بۇل قالاعا عاشىق بوپ قالدىم. فوتوعا ءتۇسىرىپ، اناما جىبەردىم. انام وسىندا كوشىپ كەلگىسى كەلەتىنىن ايتتى. مەنىڭ بۇكىل كوماندام ماعان وسى قالادا تۇرۋ كەرەك دەپ جاتىر. مەن استاناعا ەكىنشى رەت كەلدىم. العاش رەت قىركۇيەك ايىندا «2016 Feel Korea in Kazakhstan» كونسەرتىنە كەلگەنمىن. ءبىراق، ول كەزدە مۇنداي قار سۇلۋلىعىن كورگەن جوقپىن»، - دەدى ءانشى.
قازاقپارات تىلشىسىنە بەرگەن سۇحباتىندا حانبەل قازاق سوزدەرىن انىق ايتۋ ءۇشىن ۇزاق جاتتىققانىن ايتتى.
كورەي شوۋ-بيزنەسىنىڭ 26 جاستاعى جۇلدىزى 2011-جىلى وڭتۇستىك كورەيالىق «Led Apple» روك توبىندا ونەر كورسەتە باستادى. 2014-جىلى توپتان كەتىپ، جەكە ءانشى رەتىندە تانىلا باستادى. ول كورەي سەريالدارىنا ساۋندترەك جازىپ، تەلەشوۋلاردى جۇرگىزەدى.
