قىرعىزستانداعى رەفەرەندۋم: داۋىستاردى ەسەپتەۋ اياقتالدى

دۇيسەنبى كۇنى قىرعىزستان ورتالىق سايلاۋ كوميسسياسى باسپا ءسوز قىزمەتىنىڭ وكىلى نۇرجان شايلدوبەكوۆ ءمالىم ەتكەندەي، رەفەرەندۋمنىڭ نەگىزگى ماقساتى بيلىك تارماقتارى اراسىنداعى تەڭگەرىمدى ورناتۋ جانە ەلدە پارلامەنتاريزمدى نىعايتۋ بولىپ تابىلادى.

رەفەرەندۋممەن ءبىر ۋاقىتتا رەسپۋبليكانىڭ 405 ەلدى مەكەنىندە جەرگىلىكتى كەنەشكە (كەڭەس) سايلاۋ ءوتتى. الدىن الا قورىتىندىعا سايكەس رەفەرەندۋمعا 1 ميلليون 200 مىڭ سايلاۋشى قاتىستى، ياعني تىزىمگە ەنگىزىلگەندەردىڭ 42 پايىزى. كونستيتۋتسيانىڭ وزگەرىسىن 79,6 پايىز نەمەسە 955 مىڭ ادام قولدادى.

184 مىڭ سايلاۋشى قارسى داۋىس بەردى. نۇرجان شايلدوبەكوۆتىڭ ايتۋىنشا، مۇنداي كورسەتكىشتەر رەفەرەندۋم ەركىن ءارى دەموكراتيالى وتكەنىن كورسەتەدى. بارلىق قاتىسۋشىلار بيومەتريالىق سايكەستەندىرۋدەن ءوتتى.

ال بيۋللەتەندەردى ەلەكتروندى ەسەپتەگىش جاشىكتەر ساناپ شىقتى، ولار سايلاۋ ۋچاسكەلەرى جابىلعان بويدا مالىمەتتەردى اۆتوماتتى تۇردە و س ك- عا جىبەردى. الايدا، ونىمەن ءبىر مەزگىلدە ۋچاسكەلىك سايلاۋ كوميسسيالارى بارلىق بيۋللەتەندى قولمەن ەسەپتەپ، «قاعاز» حاتتامالاردى قولمەن تولتىرىپ، و س ك- عا بەرۋى ءتيىس.

رەفەرەندۋمنىڭ سوڭعى ناتيجەلەرى حاتتامالاردىڭ بارلىعى الىنعاننان كەيىن، سونداي-اق داۋىس بەرۋ بويىنشا بارلىق سوت ۇدەرىستەرى اياقتالعاننان سوڭ (ەگەر ولار تۋىنداعان جاعدايدا) جاريالاناتىن بولادى.

اۆتور: حاسەنوۆا تازاگۇل

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى