مۇحامەدي ۇلى ەركىن كۇرەستەن تۇڭعىش رەت فينالدا بەلدەسكەن بەكجانوۆتى قۇتتىقتادى

«قۇرمەتتى نۇرلان! ءسىزدى ۆەنگريا استاناسى بۋداپەشتتە كۇرەس تۇرلەرى بويىنشا وتكەن الەم چەمپيوناتىندا ەركىن كۇرەستە كۇمىس جۇلدەگەر اتانۋىڭىزبەن شىن جۇرەكتەن قۇتتىقتايمىن! بۇل جەڭىسىڭىز - تاريحي جەڭىس! سەبەبى، ءسىز قازاقستاندىق بالۋاندار اراسىنان العاشقى بولىپ اقتىق سىندا بەلدەستىڭىز. وسىعان دەيىن ەركىن كۇرەستەن الەم چەمپيوناتتارىندا 3 قولا مەدالىمىز بولسا، ەندى، مىنە ءسىز سول جەتىستىكتەردى ەسەلەپ كۇمىستەن القا تاعىپ، قازاقستاننىڭ ابىرويىن اسقاقتاتتىڭىز. وسى تاريحي جەڭىسىڭىزبەن قۇتتىقتاي كەلە، وزىڭىزگە، وتباسىڭىزعا جانە جاقىندارىڭىزعا زور دەنساۋلىق، تەڭىزدەي سارقىلماس باقىت جانە جاڭا جارقىن جەڭىستەر تىلەيمىن!» - دەپ جازىلعان قۇتتىقتاۋىندا.

ەستەرىڭىزگە سالا كەتەيىك، كۇرەس تۇرلەرىنەن بۋداپەشت قالاسىندا (ۆەنگريا) ءوتىپ جاتقان وليمپيادالىق ەمەس سالماقتار بويىنشا الەم چەميوناتىندا قازاقستاندىق بالۋان نۇرلان بەكجانوۆ كۇمىس جۇلدەگەر اتانعان بولاتىن. ول - ەركىن كۇرەستەن ەرەسەكتەر اراسىندا الەم چەمپيوناتىنىڭ فينالىنا شىققان تۇڭعىش قازاق بالۋانى. ەركىن كۇرەستەن 70 كەلى سالماق دارەجەسىنىڭ اقتىق بەلدەسۋىندە قازاق بالۋانى 4:8 ەسەبىمەن رەسەيلىك ماگومەد كۋربانالييەۆكە جول بەردى. الايدا، ول 2011-جىلدان بەرى بولماعان جۇلدەنى قازاقستانعا سىيلادى.

نۇرلان بەكجانوۆ ىرىكتەۋ كەزەڭىندە قىرعىز بالۋانى ەلامان دوعدىربەك ۇلىن 5:1 ەسەبىمەن جەڭسە، 1/8 فينالدا جەرگىلىكتى بالۋان زسومبور يستۆاندى 6:2 ەسەبىمەن تىزە بۇكتىردى. شيرەك فينالدا ميحايل ساۆانى (مولدوۆا) 0:7 ەسەبىمەن تازا جەڭدى. جارتىلاي فينالدا نوبۋوشي تاكودجيمانى 6:10 ناتيجەسىمەن جەڭىپ، فينالعا جولداما الدى.

اۆتور: كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى