ەۆرەيلەر قازاقتاردى اۋىل شارۋاشىلىعىنا ۇيرەتپەكشى

وندا ەۆرەيلەردىڭ وزىق تەحنولوگيالارى نەگىزىندە اۋال شارۋاشىعى ونىمدەرىن ءوسىرۋ تاجىريبەسى كورسەتىلەدى، دەپ حابارلايدى قازاقپارات ءتىلشىسى.

يزرايلدىڭ قازاقستانداعى توتەنشە جانە وكىلەتتى ەلشىسى ميحاەل برودسكيدىڭ ايتۋىنشا، يزرايل پرەمەر-ءمينيسترى بينيامين نەتانياحۋدىڭ قازاقستانعا جاسايتىن رەسمي ساپارى اياسىندا اۋىل شارۋاشىلىعى سالاسىندا ءوزارا ىنتىماقتاستىق تۋرالى كەلىسىمگە قول قويىلادى.

«اتالعان قۇجات وڭتۇستىك قازاقستاندا اۋىل شارۋاشىلىعى كلاستەرىن قالىپتاستىرۋعا ارنالىپ وتىر. ءبىز وسى ماسەلەنى وبلىس اكىمدىگىمەن دە تالقىلاعان بولاتىنبىز. نەگىزگى ماقسات - اۋىل شارۋاشىلىعىنا ارنالعان دەموستراتسيالىق ۋچاسكەنى اشۋ. وندا وسى سالاداعى يزرايلدىڭ تەحنولوگيالارى ورناتىلادى. سونىڭ نەگىزىندە اۋىل شارۋاشىلىعى ونىمدەرى وسىرىلەدى. ارتىنان ونى ىشكى نارىققا، ءيا بولماسا، سىرتقا ساتا ما، ونى ءالى دە تالقىلايتىن بولامىز»، - دەدى م. برودسكي استانادا وتكەن باسپا ءسوز ءماسليحاتىندا.

ايتا كەتەيىك، الداعى سارسەنبى، جەلتوقساننىڭ 14 ءى كۇنى يزرايلدىڭ پرەمەر-ءمينيسترى بينيامين نەتانياحۋ قازاقستانعا رەسمي ساپارمەن كەلەدى. پرەمەر-مينيسترمەن بىرگە ىشىندە بۇقارالىق اقپارات قۇرالدارى، سونداي-اق 70 كە جۋىق بيزنەسمەندەر بار ۇلكەن دەلەگاتسيا بولادى. ولار قازاقستان-يزرايل بيزنەس-فورۋمىنا قاتىسادى.

ب. نەتانياحۋنىڭ ءوزى الدىمەن اقورداعا بارىپ، مەملەكەت باسشىسى نۇرسۇلتان نازاربايەۆپەن كەزدەسەدى. سوسىن پارلامەنت سەناتىنىڭ توراعاسىمەن كەزدەسەدى دەگەن جوسپار بار. بۇل سوڭعى 25 جىلدا يزرايل پرەمەر-ءمينيسترىنىڭ ورتالىق ازياعا جاسايتىن العاشقى ساپارى بولماق. وسى ساپار اياسىندا يزرايل مەن قازاقستاننىڭ اراسىندا تىكەلەي اۋە رەيسى اشىلۋى ابدەن مۇمكىن.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى