جەكە تۇرعىن ءۇي سالعىسى كەلەتىندەرگە «نۇرلى جول» باعدارلاماسى بويىنشا نەسيە بەرىلەدى

ءمينيستردىڭ ايتۋىنشا، وبلىس ورتالىقتارىندا جەكە مەنشىك باسپانا قۇرىلىسىن دامىتۋ ءۇشىن جاڭا ىلكى جوبانى قولدانۋ ۇسىنىلادى. ونىڭ نەگىزگى مىندەتتەرى مىناداي: ءبىرىڭعاي قۇرىلىس سالۋشى ارقىلى ءبىرىڭعاي ساۋلەتتىك ۇلگىدە جەكە تۇرعىن ءۇي سالۋ؛ ءۇي قۇرىلىسى كومبيناتتارىنىڭ تەحنولوگيالارىن قولدانۋ ارقىلى تۇرعىن ءۇي قۇنىنىڭ قولجەتىمدىلىگىن قامتاماسىز ەتۋ؛ كەزەكتە تۇرعان ازاماتتارعا تۇرعىن ءۇي قۇرىلىس جيناق بانكىنەن جەڭىلدىكپەن قارىز بەرۋ ارقىلى جەكە تۇرعىن ءۇي قۇرىلىسىن قارجىلاندىرۋ. «ىلكى جوباعا قاتىسۋشى كەزەكتە تۇرعان ازاماتتار جەر ۋچاسكەسىمەن بىرگە جانە ينجەنەرلىك- كوممۋنيكاتسيالىق ينفراقۇرىلىم جۇرگىزىلگەن دايىن ءۇيدى وزدەرى ساتىپ الۋعا نەمەسە ءۇيدى ساتىپ الۋ ءۇشىن تۇرعىن ءۇي قۇرىلىس جيناق بانكىنەن نەسيە الۋعا قۇقىلى. بۇگىنگى كۇنى تۇرعىن ءۇي قۇرىلىس جيناق بانكى ءوزىنىڭ مەنشىكتى قاراجاتى جانە قارىز قاراجاتىنىڭ ەسەبىنەن 70 ميلليارد تەڭگەگە دەيىن قارىز بەرۋگە دايىن. تۇپكىلىكتى قارىز الۋشىنىڭ سىياقى مولشەرىن 5 پايىزعا دەيىن تومەندەتۋ ءۇشىن مەملەكەت يپوتەكالىق نەسيە بەرۋدى قولداۋ باعىتى اياسىندا سىياقى قۇنىنىڭ 7 پايىزىنا دەيىن سۋبسيديا بەرەتىن بولادى» ، - دەدى ول. ءمينيستردىڭ سوزىنە قاراعاندا، وسى ءتاسىل بويىنشا كەزەكتە تۇرعان ازاماتتار ءۇشىن اي سايىنعى تولەم العاشقى 5 جىلدا 70 مىڭ تەڭگەنى، كەيىنگى 10 جىلدا 56 مىڭ تەڭگەنى قۇرايتىن بولادى.

 اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى