قازاقستان تولقۇجاتىمەن الەمنىڭ كەز كەلگەن ەلىندە ءوزىڭدى قاۋىپسىز سەزىنەسىڭ - ادامبايەۆ
بۇل پىكىردى «ك ت ك» تەلەاراسىندا كورسەتىلگەن «25 kz. جاڭا تاريح» دەرەكتى فيلمىندە قازاقستاندىق رەجيسسەر، پروديۋسەر جانە اكتەر نۇرتاس ادامبايەۆ ءبىلدىردى، دەپ حابارلايدى قازاقپارات.
«شىندىعىن ايتقاندا مەن ءبىزدىڭ تولقۇجاتىمىزبەن الەمنىڭ كەز كەلگەن نۇكتەسىندە ءوزىمدى قاۋىپسىز سەزىنەمىن. ياعني، ءبىزدىڭ ەلىمىزگە قارسى بىردە-ءبىر حالىقتىڭ اگرەسسيالىق پيعىلى جوق ەكەندىگىن بىلەمىن. بارلىعى دا قازاقستاندى جىلى قابىلدايدى. بۇل ءبىزدىڭ ەلىمىزدىڭ قانداي دا ءبىر اسكەري، ساياسي جانجالدارعا قولداۋ بىلدىرمەۋىنىڭ ناقتى ناتيجەسى دەپ بىلەمىن. مەملەكەت باسشىمىز باعىت بەرگەن بەيبىت سۇيگىش ەلدىگىمىز ءوز جەمىسىن بەرىپ وتىر»، - دەدى نۇرتاس ادامبايەۆ.
بۇل پىكىردى ريو وليمپياداسىنىڭ چەمپيونى دميتري بالاندين دە قولدايدى. «بىردە-ءبىر ەلمەن ارادا جانجالىمىز جوقتىعى مەنى قاتتى قۋانتادى. ءبىز بارىمەن دە دوسپىز ءارى ەلباسىمىز وتە كورەگەن ساياسات جۇرگىزىپ وتىر. سوندىقتان كوگىلدىر تولقۇجاتپەن الەمنىڭ كەز كەلگەن ەلىنە بارىپ، ەشتەڭەدەن قورىقپاۋعا بولادى»، - دەدى بالاندين.
