شىمكەنت قالاسىن دۇنيەجۇزىلىك «مادەني مۇرا» باعدارلاماسىنا ەنگىزۋ كەرەك - عالىم
بۇل تۋرالى شىمكەنتتە وتكەن حالىقارالىق عىلىمي تاجىريبەلىك كونفەرەنسيادا الكەي مارعۇلان اتىنداعى ارحەولوگيا ينستيتۋتىنىڭ ديرەكتورى باۋىرجان بايتانايەۆ مالىمدەدى.
مۇحتار اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىندە 26 ەلدىڭ 100 دەن استام عالىمى «قازاقستان جولى: ۇلت كوشباسشىسىمەن بىرگە 25 جىل. بەيبىتشىلىك پەن جاسامپازدىق» تاقىرىبىن قاۋزادى. شارانىڭ ماقساتى - قازاقستاننىڭ قالىپتاسۋ كەزەڭى مەن وتكەن جولىن وزگەگە تانىتۋ. جيىنعا قاتىسۋشىلار مۇندا ارنايى كورمەنى تاماشالادى. وعان قازبا جۇمىستارى كەزىندە تابىلعان جادىگەرلەر مەن قۇندى قۇجاتتار قويىلعان. كەيىن ەلدىڭ وتكەنىن زەرتتەپ، زەردەلەپ جۇرگەن ماماندار بايانداما جاسادى. ونىڭ بارلىعى قازاق ەلىنىڭ شيرەك عاسىرداعى جەتىستىكتەرى مەن ەرتەدەگى تىرشىلىگىن قامتيدى.
وتاندىق عالىمداردىڭ وردالى ويى بىرەۋ. شىمكەنتكە تاريحي قالا مارتەبەسىن الىپ بەرۋ. بۇل باعىتتا تالاي جىل زەرتتەۋ جۇمىستارىن جۇرگىزگەن باۋىرجان بايتانايەۆ شاھار تاريحىنىڭ تىم تەرەڭدە ەكەنىن جەتكىزدى.
ول قالانىڭ 2000 جىلدان استام شەجىرەسى بار دەپ ناقتى ايتتى. سوندىقتان، بيلىك تاراپىنان قولداۋ بولسا، قاجەتتى قۇجاتتاردى «يۋنەسكو» ۇيىمىنا ۇسىنۋ نيەتتە بار. كونفەرەنسيا اياسىندا شەتەلدىك عالىمدار ءوڭىردىڭ تاريحي جەرلەرىمەن تانىستىرىلدى.
